Kjörseðlarnir hefðu getað verið skýrari

Þórunn Guðmundsdóttir, fyrrverandi oddviti yfirkjörstjórnar í Reykjavík norður, telur að kjörseðlarnir fyrir forsetakosningarnar hefðu getað verið skýrari. Hún telur að óskýrleikinn geti skilað sér í fleiri vafaatkvæðum en vant er.

„Mér fannst þessi seðill ekki góður," segir Þórunn. Það hefði mátt vera lítill ferningur fyrir framan nöfn frambjóðendanna.

Samkvæmt lögum eiga kjósendur að greiða atkvæði sín með því að setja kross framan við nafn frambjóðanda. Sé þeim reglum ekki fylgt teljast seðlarnir vafaatkvæði. Þá þarf að yfirfara þá sérstaklega. Það þýðir þó ekki að þeir teljist ógildir því ef vilja kjósandans má auðveldlega lesa af seðlinum þá telst atkvæðið gilt þó ekki sé farið eftir formreglum. Því þurfa til dæmis þeir kjósendur sem gerðu hring utan um sinn frambjóðanda líklega ekki að örvænta því slík atkvæði verða talin með.

Kjörseðill dagsins.

Þórunn telur að einhverjar kjörstjórnir hafi verið meðvitaðar um hve óskýr seðillinn var því þegar hún mætti í Ráðhúsið í dag og fékk afhentan seðil var henni sérstaklega bent á að seðillinn væri ekki alls kostar skýr og hún ætti að setja kross framan við nafn frambjóðandans. Hún leiðir líkum að því að kjörstjórnir hafi fengið einhverjar ábendingar eða kvartanir vegna seðlanna.