Kelis, FKA Twigs og Skream á Solstice: Fimmtíu ný nöfn bætast við

Fimmtíu listamenn hafa bæst við dagskrá Secret Solstice hátíðarinnar sem fram fer í Laugardalnum dagana 19.-21. júní næstkomandi. Meðal listamanna í þeim hópi má nefna FKA Twigs, Kelis, Hjálma, Skream og Totally Enourmous Extinct Dinosaurs og Helga Björnsson. Áður hafði verið upplýst um sextíu sveitir sem fram koma og má þar á meðal nefna The Wailers og Wu-Tang Clan.

„Við erum mjög stolt að kynna til viðbótar u.þ.b. 50 ný nöfn á dagskránna okkar. Bæði erlendir og íslenskir listamenn hafa verið kynntir til viðbótar við nú þegar glæsilga dagskrá. Þetta stefnir í rosalega veislu hjá okkur sem verður alls ekki síðri en í fyrra,“ segir Friðrik Ólafsson, framkvæmdastjóri Secret Solstice. „Þetta eru þeir dagar sem eru lengstir á árinu og sólin sest aldrei, það ætti hver Íslendingur að sjá sér skyldu í því halda uppá það með almennilegum hætti.“

Poppdívan Kelis hefur boðað komu sína. Hún er kannski betur þekkt sem stúlkan kom með mjólkurhristingin beint í garðinn alla leið frá Harlem. Kelis hefur unnið til margra verðlauna eins og Brit Awards, Q Awards og NME verðauna auk þess að vera tilnefnd til tveggja Grammy verðlauna.

FKA Twigs er listamannsnafn Tahliah Debrett Barnett en hún er 27 ára ensk tónlistarkona. Fyrsta breiðskífa hennar, LP1, kom út í fyrra og var ofarlega á listum helstu tónlistartímarita yfir bestu plötur ársins. Hún var meðal annars tilnefnd til Mercury verðlauna auk Grammy og Brit verðlauna fyrir plötu sína.

Totally Enourmous Extinct Dinosaurs er nafnið sem Bretinn Orlando Higginbottom notar þegar hann flytur tónlist sína. Hann hefur gefið út eina plötu fyrir þremur árum síðan og meira efni er væntanlegt frá honum. Sviðsframkoma hans er einnig lífleg.

Hjálma frá Keflavík þarf ekki að kynna til sögunnar enda öllum Íslendingum kunnir. Hljómsveitin hefur starfað í rúmlega áratug og á þeim tíma hafa komið út sex breiðskífur, sú síðasta árið 2011. Nú þegar hefur verið tilkynnt um að The Wailers komi fram og ljóst að það verður reggí á Secret Solstice.

Helga Björnsson þarf heldur ekki að kynna enda spannar tónlistarferill hans um þrjá áratugi. Grafík, Síðan Skein Sól og Reiðmenn vindanna. Á boðstólum af hans hálfu verða lög sem hann hefur sungið í gegnum tíðina.

Miðasala fer fram á tix.is og verða 2.500 miðar í boði á 18.900 krónur áður en verðið hækkar á ný. Hér að neðan má sjá alla listamennina sem tilkynn var um í dag.

Wu-Tang Clan [US], FKA Twigs [UK], Kelis [US], Hjálmar [IS], Tale Of Us [DE], Skream [UK], Totally Enormous Extinct Dinosaurs [UK], Nick Curly [DE], Guti [AR], Agent Fresco [IS], Thugfucker [US], Mind Against [DE], Gísli Pálmi [IS], Úlfur Úlfur [IS], Javi Bora [ES], Helgi Björnsson [IS], Júníus Meyvant [IS], Emmsjé Gauti [IS], Bent [IS], Arkir [IS], Egill Tiny [IS], Benni B Ruff & Friends [IS], Yamaho [IS], Benny Crespo's Gang [IS], Tetris Takeover [IS], Bones [CA], Halleluwah [IS], 7 Berg [IS], Mella Dee [UK], Sturle Dagsland [NO], Máni Orrason [IS], Macro/micro [US], Stereo Hypnosis [IS], Geimfarar [IS], Shades of Reykjavík [IS], Þriðja Hæðin [IS], Mushy [UK], Axel Flóvent [IS], BeatmachineAron [IS], Hr. Hnetusmjör [IS], GKR [IS], Frímann [IS], Luca Pilato [UK], Jóhannes Lafontaine [IS], Marteinn [IS] og Proxy 2.0 [UK].