Justin Timberlake borðar mat frá Vox

Mikið er um að vera í knattspyrnuhöllinni Kórnum þessa dagana þar sem verið er að standsetja húsið undir tónleika Justins Timberlake sem fram fara næstkomandi sunnudagskvöld. Öllu verður umturnað í Kórnum en nánast allur hljóð- og ljósabúnaður, sviðs- og annar tæknibúnaður hér á landi verður notaður í Kórnum, ásamt 18 tonnum af tæknibúnaði sem kemur að utan. Talið er að um 500 manns komi til með að starfa í kringum tónleikana.

Í gærkvöldi fóru fram síðustu tónleikar Justins Timberlake áður en hann kemur fram á Íslandi, þegar hann kom fram í PGE-höllinni í Gdansk í Póllandi. Um síðustu helgi var Timberlake aðalnúmerið þegar hann kom fram á V-hátíðinni á Englandi.

Kröfulisti Justins Timberlake er hóflegur en Fréttablaðið hefur áreiðanlegar heimildir fyrir því að Justin og hans fólk muni borða mat frá Vox og að einhverjir drykkir séu sérpantaðir að utan.

Fólk á vegum söngvarans hefur verið í sambandi við tónleikahaldara hér á landi vegna ólgunnar í Bárðarbungu. „Þeir höfðu séð umfjöllun fjölmiðla erlendis og hringdu í okkur í gær. Þetta var mjög gott samtal. Þeir vildu fá að vita þetta frá fólkinu sem býr hér á Íslandi, hvernig þetta væri í raun og veru,“ segir Ísleifur B. Þórhallsson, tónleikahaldari.

„Sérfræðingar segja að það sé rosalega ólíklegt að eitthvað gerist sem hafi mikil áhrif á flugsamgöngur. Við höldum áfram að undirbúa tónleikana. Við fylgjumst vel með fréttum en eins og staðan er núna bendir ekkert til þess að við þurfum að hafa áhyggjur. Bárðarbunga er í 400 kílómetra fjarlægð frá Keflavík og vindáttin er þannig að það er ólíklegt að þetta hafi áhrif á flug, eftir því sem við best vitum.“

Það verður ýmislegt til sölu á tónleikunum:

Bolir

Derhúfur

Vesti

Hettupeysur

Stuttbuxur

Bollar

Plaköt

Snjallsímahulstur

Skotglös

Lyklakippur

Armbönd

Ýmislegt annað

Lagalisti frá tónleikum Justins Timberlake í Póllandi í gærkvöldi:

Pusher Love Girl

Rock Your Body

FutureSex/LoveSound

My Love

TKO

Summer Love

LoveStoned

Until the End of Time

Holy Grail (JAY Z cover)

Cry Me a River

Señorita

Take Back the Night

Shake Your Body (Down to the Ground) (The Jacksons cover)

Not a Bad Thing

What Goes Around... Comes Around

Suit & Tie

SexyBack

Mirrors