Júlíspá Siggu Kling - Vatnsberi: Leiðtoginn sem lætur ekkert stoppa sig

Hjartans viskumikli vatnsberi. Þú ert svo mikið að átta þig á öllu mögulegu núna að það er unun að horfa á. Þú ert til dæmis að átta þig á að það ert þú sem þarft að gera hlutina og að þú getir ekki beðið eftir að aðrir geri þá. Þú ert viljasterkur leiðtogi og þú skalt bara storma áfram eins og enginn sé morgundagurinn.

Þú átt aldrei eftir að lifa lífi sem verður of hefðbundið. Þú þarft til dæmis alltaf að hafa heimilið aðeins öðruvísi. Það er eins og þú sért alltaf að finna eitthvað upp. Þú ert svo óútreiknanlegur og skemmtilegur og átt að nýta þér það til fulls þessa mánuði. Þótt það hafi verið pínu mistök í gangi þá gera mistökin mann merkilegri en ella. Það á miklu meira eftir að gerast í lífi þínu núna en þú bjóst við. Tekjurnar verða ekki eins miklar og þú gerðir ráð fyrir en peningar koma annars staðar frá.

Þetta verður með skemmtilegri sumrum sem þú hefur siglt í gegnum, þrátt fyrir veðrið. Þú munt ekki láta það hafa áhrif á þig. Það er það góða við vatnsberann. Hann hefur hæfileika til að útiloka leiðindi og erfiðleika. Þú ert svo mikil fyrirmynd og þú þarft að vita það. Það er svo mikil frásagnarorka í þér og þú ert svo góður sögumaður en gefur þér líka alltaf tíma til að hlusta á aðra. Þú hefur mikla hæfileika þar.

Það er eins og það komi til þín eins og elding hvernig þú eigir að leysa vandamál þín. Og þú getur gengið teinréttur í burtu. Þú ferð í ferðalag sem mun breyta mörgu hjá þér og þú verður svo sáttur. Mundu að hlakka til.

Mottó: Ég er frjáls.



Frægir í vatnsberanum: Ragnheiður Guðfinna, Pacas hans Begga, Geir Sveinsson handknattleiksþjálfari, Halla himintungl, Clark Gable leikari, Sveinbjörg Birna Sveinbjörnsdóttir borgarfulltrúi, Yoko Ono, Bjarni Benediktsson fjármála- og efnahagsráðherra, Katrín Jakobsdóttir þingkona og fyrrum ráðherra, Hilmir Snær Guðnason leikari.