Júlíspá Siggu Kling - Steingeit: Ástin og vináttan umlykur þig

Elsku þrautseiga steingeit. Þú gætir bognað en aldrei muntu brotna. Þess vegna líki ég þér við bambusinn. Það er einhvern veginn þannig að pottþéttasta fólkið er fætt í steingeitinni. En stundum geturðu verið of pottþétt, elsku hjartað mitt. Þú þarft að leyfa þér að blómstra meira, taka inn örlítið meira kæruleysi og þú mátt klikka aðeins á smáatriðunum. Þrjóska þín er alveg ágæt í mörgu en stundum hefurðu rangt fyrir þér, ég sver það.

Það er mikill tilfinningahiti yfir þessu tímabili. Það er ástin, vináttan og lífið. Þú ert að plana og plana og það er bara gott. Þú munt eyða dálítið umefni fram og leyfðu þér bara að njóta þess. Þú færð borgað til baka frá veröldinni og peningaáhyggjur tilheyra morgundeginum, alls ekki núinu. Það er mjög algengt að steingeitur efnist vel og nái miklum árangri í lífinu. Svo þarf ég að segja við þig, þú ert bara ung. Bara barn, elskan mín, svo hafðu ekki áhyggjur. Þú átt eftir að fá svo margt upp í hendurnar og þú getur lifað letilífi, ef þig langar til þess.

Þú þarft að taka betur eftir næmni þinni, léttri, skemmtilegri orkunni og brjálæðislega góða húmornum. Hann mun koma þér langt. Ef þú átt leyndarmál þá skaltu hafa þau algjörlega hjá þér núna því orkan gæti orðið þannig að það komist upp um eitthvað sem þú vilt alls ekki að komist upp. Þjóð veit þá þrír vita! Ef þú ert með eitthvað hjartasár þá mun það gróa á styttri tíma en þú býst við. Þó þú sért svona minnug, þá ertu sterkari en allt.

Mottó: Ég skal horfast í augu við lífið allt – ég græði á því þúsundfalt.



Frægar steingeitur: Guðjón Pétur Lýðsson markakóngur, Svava Johansen í sautján, Ingibjörg Sólrún Gísladóttir, Dr. Kristín Ólafsdóttir,Jón Gnarr, Elvis Presley, Gunnar Þórðarsson, Jesú.