Júlíspá Siggu Kling - Bogmaður: Nýttu þér heppnina þína

Besti, besti bogmaður. Þú hefur svo sterkan kjarna og þú veist alltaf hvað þú ætlar að gera. Þú þarft að gera allt svo vel að maður öfundar þig stundum. Happdrætti Háskóla Íslands sagði að bogmaðurinn og vogin væru heppnustu merkin, miðað við þá sem hafa fengið þar vinninga. Þessu trúi ég. Þú átt að nýta þér að það er yfir þér sérstök heppni.

Þú þarft að vera mjög ákveðinn í því hvernig þú vilt hafa hlutina. Þetta verður mjög spennuríkt sumar, margt að gerast og þú verður úti um allt. Þú átt eftir að elska þetta. Þú munt ganga frá þínu gagnvart vinum og fjölskyldu og þú munt hugsa húrra! Því þú bjóst ekki við því í fyrra að það myndi ganga svona vel. 2015 verður árið sem þú, elskan mín, segir: Þetta var árið mitt. Auðvitað hefurðu verið þreyttur á köflum og pirraður, en það er alveg eðlilegt.

Ef þú ert í stuði fyrir ástina, þá er ástin alls staðar, bara bentu. Ef ekki, þá þarftu að segja það skýrt að þú viljir fá að vera í friði. Þú munt alltaf ná í þann sem þú ert að eltast við. Ef þú nennir í eltingaleik þá þarftu bara að klukka.

Líkami þinn, elskan mín, endurspeglar alltaf hvernig þér líður svo vertu bara sáttur við það sem þú hefur eða gerðu eitthvað í því, þú ræður því. Þetta er allavega tími gamansins. Júpíter er svo sannarlega að skrifa eina skemmtilegustu ævisögu sem til er fyrir þig. Þú ert að byrja á nýjum kafla og settu þig í aðalhlutverkið þar. Allavega ætlar Júpíter að standa þér við hlið.

Mottó: Júpíter setur kraft í orðin, fyrir framan mig er hamingjuforðinn.



Frægir bogmenn: Ingvar E. Sigurðsson leikari, Björgvin Franz Gíslason leikari, Edda Heiðrún Backman leikkona, Regína Ósk Óskarsdóttir söngkona, Sigrún í Gyðja Collecton, Steindi, Bryndís Ásmundsdóttir leik- og sngkona, Jóhanna Vilhjálmsdóttir fjallkona og leikkona.