Jón Ingi Sigurðsson útnefndur íþróttamaður Borgarbyggðar 2011

Í dag útnefndi íþrótta- og tómstundanefnd Borgarbyggðar íþróttamann sveitarfélagsins fyrir árið 2011. Er þetta í 21. skipti sem verðlaunin eru veitt og fór athöfnin fram í Hjálmakletti í Borgarnesi. Nafnbótina að þessu sinni hlaut sundmaðurinn Jón Ingi Sigurðsson og er þetta annað árið í röð sem hann hlýtur hana. Jón Ingi hefur náði góðum árangri á árinu og var meðal annars tvöfaldur aldursflokkameistari í sundi, keppti fyrir hönd unglingalandsliðsins á erlendri grundu og margbætti héraðsmet. Jafnframt var afreksfólk ársins í hverri íþróttagrein sem stunduð er í sveitarfélaginu heiðrað auk þess sem landsliðsfólk hlaut sérstaka viðurkenningu. Þá hlaut hinn efnilegi dansari Brynjar Björnsson frá Hvanneyri viðurkenningu úr minningarsjóði Auðuns Hlíðkvists Kristmarssonar.