Körfubolti

Jeff Hornacek verður næsti þjálfari New York Knicks

Óskar Ófeigur Jónsson skrifar
Jeff Hornacek.
Jeff Hornacek. Vísir/Getty
Bandarískir fjölmiðlar hafa heimildir fyrir því að Jeff Hornacek, fyrrum leikmaður Utah og þjálfari Phoenix Suns, verði næsti þjálfari New York Knicks í NBA-deildinni í körfubolta.

Bleacher Report sagði fyrst frá þessi en síðan hafa miðlar eins og ESPN fengið sömu upplýsingar frá sínum heimildarmönnum.

Phil Jackson, forseti New York Knicks og framkvæmdastjórinn Steve Mills snæddu kvöldverð með Jeff Hornacek á steikhúsi í New York í gærkvöldi. Jackson vildi þó ekkert staðfesta neitt um ráðninguna í viðtali við New York Daily News.

Það kemur nokkuð á óvart að Jeff Hornacek fái þetta starf því margir aðrir hafa verið orðaðir við starfið að undanförnu. Hann er allt annað en þekktur fyrir að nota uppáhaldssókn Phil Jackson sem er þríhyrningssóknin.

Jeff Hornacek þjálfaði í NBA-deildinni í vetur en Phoenix Suns rak hann í febrúar eftir að liðið hafði tapað 19 af 21 leik og fjórtán leikjum í röð á útivelli.

Phoenix Suns byrjaði vel undir stjórn Hornacek og vann 48 og 39 sigra á fyrstu tveimur tímabilunum. Liðið var hinsvegar aðeins búið að vinna 14 af 49 leikjum sínum þegar hann var látinn fara í vetur.

Phil Jackson rak Derek Fisher í febrúar og Kurt Rambis tók við liðinu. Hann fær hinsvegar ekki að halda áfram með liðið en verður líklega áfram viðloðandi Knicks-liðið.

Hornacek átti sjálfur flottan NBA-feril. Hann spilaði fyrstu sex árin með Phoenix Suns en fór síðan til Utah Jazz. Þar komst hann í lokaúrslitin tvö ár í röð, 1997 og 1998, en tapaði í bæði skiptin á móti Chicago Bulls. Phil Jackson þjálfaði einmitt Bulls-liðið á þeim tíma.

Það hefur gengið illa hjá Phil Jackson að gera New York Knicks aftur að alvöru liði í NBA-deildinni síðan að hann settist í forsetastólinn. Það verður áfram mikil pressa á honum sem og nýja þjálfaranum að gera liðið aftur samkeppnishæft í deildinni.

NBA



Fleiri fréttir

Sjá meira


×