Innlent

Jafnrétti á vinnustað verk sem þarf að henda sér í

Nanna Elísa Jakobsdóttir skrifar
Birna Einarsdóttir, bankastjóri Íslandsbanka, veitti verðlaununum viðtöku úr hendi Ragnheiðar Elínar Árnadóttur ráðherra.
Birna Einarsdóttir, bankastjóri Íslandsbanka, veitti verðlaununum viðtöku úr hendi Ragnheiðar Elínar Árnadóttur ráðherra. Vísir/Aðsend
„Við erum afar stolt af þessari viðurkenningu. Ég vil taka undir það að þetta er bara verk að vinna og það er ekkert annað en að henda sér í verkið. Baráttumálið mitt núna er jafnlaunastefnan. Það er ótrúlegt að geta fengið verðlaun fyrir jafnréttismál þegar launamunurinn er 3 prósent,“ sagði Birna Einarsdóttir, bankastjóri íslandsbanka, en Íslandsbanki hlaut í dag Hvatningarverðlaun jafnréttismála.  

Verðlaunin voru veitt á ráðstefnunni „Er pláss fyrir jafnrétti í nýsköpun?“ sem haldinn var í Háskólanum í Reykjavík í dag. Ragnheiður Elín Árnadóttir iðnaðar- og viðskiptaráðherra afhenti verðlaunin en það eru Atvinnuvega- og nýsköpunarráðuneytið, landsnefnd UN Women á Íslandi, Samtök atvinnulífsins og Festa – miðstöð um samfélagsábyrgð.

Ragnheiður Elín tók undir með fyrirlesurum á ráðstefnunni sem nefndu að jafnrétti væri verkefni til að ráðast í.Vísir/Anton Brink
Íslandsbanki hefur fengið sérstaka viðurkenningu sem fyrirtæki með launamun undir 3 prósentum fá og gerði Birna það að umtalsefni sínu að nauðsynlegt væri að breyta því viðvarandi ástandi að það ríkti launamunur milli kynjanna á vinnumarkaði. Þá vísaði hún í erindi Bjarna Bjarnasonar, forstjóra Orkuveitu Reykjavíkur, fyrr á ráðstefnunni sem sagði jafnrétti á vinnustaðnum vera verkefni sem þyrfti að takast á við og leysa en OR hefur hlotið sömu verðlaun og fengið mikið lof fyrir störf sín í jafnréttismálum. 

Íslandsbanki unnið með FAK og UAK

Íslandsbanki var einróma valinn af dómnefnd sem taldi bankann hafa sett jafnréttismál á oddinn með afdráttarlausum hætti og jafnframt hvatt önnur til að gera það sama. 

Ragnheiður Elín ávarpaði ráðstefnuna og las upp úr umsögn dómnefndarinnar um Íslandsbanka. En dómnefndin taldi bankann hafa tryggt að þættir bæði í innra og ytra skipulagi sínu stuðli að jafnrétti, skýrt sé að kynin njóti sambærilegs framgangs í starfi, mannauðsstefna bankans aðgengileg og mælanlegur árangur birtur opinberlega. 

„Fyrirtækið vill vera fyrirmynd í jafnréttismálum,“ sagði Ragnheiður Elín og nefndi að jafnréttisstefna þess sé kynnt nýjum stjórnendum strax í upphaf. Þá hefur bankinn unnið með Félagi kvenna í atvinnulífinu, FKA, verið aðalstuðningsaðili félagsins og haldið með því frumkvöðlakeppni. Þá er Íslandsbanki einn styrktaraðila Ungra athafnakvenna.




Fleiri fréttir

Sjá meira


×