Innlent

Íslensk gæsluflugvél til Miðjarðarhafsins

Jón Hákon Halldórsson skrifar
30. júlí var 437 flóttamönnum bjargað og voru þeir fluttir til hafnar í Pozzallo á Sikiley. Lögreglan handtók fjóra sem grunaðir eru um mansal.
30. júlí var 437 flóttamönnum bjargað og voru þeir fluttir til hafnar í Pozzallo á Sikiley. Lögreglan handtók fjóra sem grunaðir eru um mansal. vísir/epa
Stjórnendur Landhelgisgæslunnar reikna með því að senda flugvél Gæslunnar, TF Sif, í verkefni á vegum Frontex, landamærastofnunar Evrópusambandsins, við Miðjarðarhaf í lok ágústmánaðar.

Svanhildur Sverrisdóttir, upplýsingafulltrúi Landhelgisgæslunnar, segir að Frontex óski eftir mismunandi tækjum frá þeim þjóðum sem stofnunin á samskipti við. Þörfin hverju sinni ráði óskum Frontex. Þjóðirnar taki svo afstöðu til þeirra beiðna. „Núna er það flugvélin sem hefur verið óskað eftir,“ segir hún.

Skip Landhelgisgæslunnar hafa ekki verið að störfum á Miðjarðarhafi það sem af er ári en í fyrra voru bæði Ægir og Týr í verkefnum á vegum Frontex. Eins og greint var frá á þeim tíma, tóku áhafnir skipanna þátt í björgun hundraða flóttamanna.

Lítið hefur verið greint frá stöðu flóttamanna við Miðjarðarhaf undan­farnar vikur. Ástandið er þó enn grafalvarlegt og vinnur Rauði kross Íslands að margvíslegum verkefnum í þágu þeirra.

Atli Viðar Thorstensen, sviðsstjóri Hjálpar- og mannúðarsviðs Rauða kross Íslands, segir að Rauði krossinn styðji verkefni í Líbanon og styðji einnig alþjóðaráð Rauða krossins í Sýrlandi.

Verkefni til langs tíma

„Hugsunin með starfinu í Sýrlandi er að gera því fólki sem enn er í Sýrlandi, og annaðhvort getur ekki eða vill ekki fara, kleift að vera áfram,“ segir Atli. Rauði krossinn vinnur með Rauða hálfmánanum í Sýrlandi og snýst stafið meðal annars um að halda vatnsveitukerfinu gangandi meira og minna. „Það er líka verið að dreifa matvælum, teppum og hreinlætisvörum til þeirra sem eru á flótta innan Sýrlands og líka þeirra sem eru á sínum heimaslóðum en hafa ekki aðgengi að neinni björgun.“

Í Líbanon styður Rauði krossinn á Íslandi og í Noregi við heilsugæslu á hjólum sem veitir flóttafólki almenna heilsugæslu og þjónustu að öðru leyti. Rauði krossinn í Líbanon veitir þjónustuna en Íslendingar og Norðmenn leggja til fé og tæknilega aðstoð. Stuðningurinn í Sýrlandi er svipaður.

Íslenskur læknir og hjúkrunarfræðingur störfuðu í Dohuk í Kúrd­istan í Írak fyrir um það bil ári og einnig hefur sendifólk starfað í Bagdad­ á vegum Rauða kross Íslands. Þá var íslenskur geðhjúkrunarfræðingur, Páll Biering, starfandi í Grikklandi fyrr á árinu og þar hefur einnig María Ólafsdóttir læknir verið starfandi.

Atli Viðar segir að Rauði kross Íslands líti á stuðninginn sem verkefni til langs tíma. Hann nefnir sem dæmi að Líbanon sé smáríki, með um fjórar til fimm milljónir íbúa. Þar sé aftur á móti um ein milljón flóttamanna sem hvorki geti né vilji snúa heim aftur í bráð. Stuðningur Rauða krossins sé því verkefni sem muni vara í nokkur ár. Hann segir utanríkisráðuneytið hafa stutt dyggilega við verkefnið.

Þessi frétt birtist fyrst í Fréttablaðinu þann 9. ágúst 2016.


Tengdar fréttir

Hundruð barna hafa drukknað

Að meðaltali tvö börn hafa drukknað á hverjum degi síðan í september á síðasta ári í tilraunum flóttamanna til að flýja yfir Miðjarðarhafið.




Fleiri fréttir

Sjá meira


×