Íslendingaliðin í Frakklandi unnu í gær

St. Raphael og USAM Nimes unnu bæði sína leiki í Frakklandi í gær og eru í fjórða og fimmta sæti frönsku úrvalsdeildarinnar.

Bjarni Fritzson skoraði eitt mark í naumun sigri St. Raphael á Istres, 27-26. Liðið er í fjórða sæti deildarinnar með tólf stig en aðeins skilja tvö stig liðin að í þriðja og níunda sæti deildarinnar.

Ragnar Óskarsson skoraði sex mörk fyrir Nimes sem vann níu marka sigur á Toulouse í gær, 29-20. Hann var reyndar ekki markahæsti leikmaður liðsins eins og svo oft áður en er engu að síður langmarkahæsti leikmaður deildarinnar með 93 mörk, tuttugu mörkum meira en næsti maður.