Innlent

Innleiðing EES-tilskipana: Ísland stendur sig enn verst allra

Atli Ísleifsson skrifar
Íslandi hefur tekist að minnka innleiðingarhallann úr 2,8 prósent í nóvember í fyrra í 2,1 prósent í apríl síðastliðinn, en er enn sú versta á Evrópska efnahagssvæðinu öllu.
Íslandi hefur tekist að minnka innleiðingarhallann úr 2,8 prósent í nóvember í fyrra í 2,1 prósent í apríl síðastliðinn, en er enn sú versta á Evrópska efnahagssvæðinu öllu. Vísir/GVA
Ísland hefur bætt innleiðingar gerða í EES-samningnum milli mælinga á enn langt í land. Þetta kemur fram í nýju frammistöðumati EES sem Eftirlitsstofnun EFTA birti í dag.

Íslandi hefur tekist að minnka innleiðingarhallann úr 2,8 prósent í nóvember í fyrra í 2,1 prósent í apríl síðastliðinn, en er enn sú versta á Evrópska efnahagssvæðinu öllu.

Enn langt í land

Helga Jónsdóttir stjórnarmaður í ESA, segir að þrátt fyrir að frammistaða Íslands hafi batnað milli mælinga sé enn langt í land.

„Innleiðing sameiginlegra reglna á réttum tíma er forsenda þess að innri markaðurinn virki vel og áframhaldandi trausts annarra aðila EES-samningsins. Frammistaða Noregs sýnir glöggt að með góðri stefnumörkun og eftirfylgni er hægt að minnka innleiðingarhalla verulega á skömmum tíma. Við hvetjum íslensk stjórnvöld til að gera enn betur og tryggja að Ísland verði ekki eftirbátur hinna EFTA-ríkjanna.“

Noregur aldrei staðið sig betur

Í frétt á vef ESA segir að Noregur hafi aldrei staðið betur að innleiðingu tilskipana frá upphafi mælinga þar em einungis ein tilskipun hafi ekki verið innleidd. „Ísland hefur einnig bætt sig en þarf að gera betur. Frammistaða Liechtenstein er einnig betri en raunin var síðast.“

Frammistöðumat innri markaðarins er birt tvisvar á ári og sýnir hvernig stjórnvöldum á Íslandi, í Liechtenstein og Noregi gengur að innleiða tilskipanir og reglugerðir innri markaðarins á réttum tíma. „Innleiðingarhalli tilskipana sýnir hlutfall tilskipana sem ekki hafa verið innleiddar eða ESA hefur ekki verið tilkynnt um innleiðingu á innan réttra tímamarka. Þessi mæling tekur aðeins til þeirra gerða sem EFTA-ríkin hafa skuldbundið sig til að innleiða á grundvelli EES-samningsins,“ segir í fréttinni.

Meðalinnleiðingarhalli EFTA-ríkjanna þriggja mælist nú 1.1% en hann er 0.7% að meðaltali í aðildarríkjum Evrópusambandsins (ESB).

Raunhæft að Ísland bæti stöðu sína enn frekar

Í tilkynningu frá utanríkisráðuneytinu segir að unnið hafi verið á grundvelli Evrópustefnu ríkisstjórnarinnar frá 2014 að því að bæta framkvæmd EES-samningsins hér á landi.

„Frammistöðumat ESA nú talar sínu máli en það er árangur þeirra aðgerða stjórnvalda sem lagt var til í Evrópustefnunni.

Á meðal aðgerða má nefna að málefni EES-samningsins – innleiðingarmál þar með talin - eru nú reglulega rædd í ríkisstjórn. Upplýsingagjöf til ráðuneyta hefur verið efld og fræðslustarf aukið. Komið var á fót sérstökum stýrihópi undir stjórn forsætisráðuneytisins sem unnið hefur að því að því að skilgreina flöskuhálsa og bæta ferla við vinnslu EES mála í íslenskri stjórnsýslu.

Áfram er unnið að því að ná því markmiði stjórnvalda að innleiðingarhallinn fari niður fyrir 1%. ESA mun framkvæmda nýtt frammistöðumat í lok þessa mánaðar og er raunhæft að Ísland geti þá bætt stöðu sína enn frekar,“ segir í tilkynningunni.


Tengdar fréttir

Vill fjölga sérfræðingum í Brussel til að hafa áhrif á tilskipanir

Utanríkisráðherra vill fjölga íslenskum sérfræðingum ráðuneytanna í Brussel til að hafa áhrif á mótun tilskipana sem eru teknar upp í EES-samninginn. Ríkisstjórnin hefur hrint í framkvæmd öllum aðgerðum Evrópustefnu sinnar þótt markmið hennar hafi ekki náðst.

Árni Páll segir stjórnvöld ekki standa við eigin Evrópustefnu

Formaður Samfylkingarinnar gagnrýnir ríkisstjórnina fyrir að standa ekki við eigin Evrópustefnu. Dómsmál séu fleiri og innleiðingarhalli meiri en staðið hafi til. Þingmaður Framsóknarflokksins segir önnur mikilvægari mál vera innanlands.




Fleiri fréttir

Sjá meira


×