Handbolti

Umfjöllun: Angóla - Ísland 19-33 | Auðveldur sigur á Angóla

Henry Birgir Gunnarsson skrifar
Bjarki Már Gunnarsson í baráttunni í vörninni í kvöld.
Bjarki Már Gunnarsson í baráttunni í vörninni í kvöld. vísir/afp
Íslenska landsliðið í handbolta vann sinn fyrsta sigur á HM 2017 í Frakklandi í kvöld þegar það lagði Angóla auðveldlega, 33-19. Strákarnir okkar eru nú komnir með þrjú stig í riðlinum og geta tryggt sér þriðja sætið með sigri á Makedóníu ef Spánni gerir okkur greiða annað kvöld og hefur sigur á Makedóníumönnum.

Leikstjórnandinn Janus Daði Smárason var tæpur vegna hnémeiðsla í kvöld og tók Geir Sveinsson þá ákvörðun um að hvíla hann alfarið. Geir stillti öllum reynslumestu mönnum liðsins upp í byrjunarliðinu í kvöld vitandi það að markatalan getur skipt miklu máli þegar riðlakeppninni er lokið.

Leikurinn fór hægt af stað og voru strákarnir ekki nema tveimur mörkum yfir, 8-6, þegar fjórtán mínútur voru eftir en þá skellti íslenska liðið í lás í vörninni og fór að fá mikið af auðveldum mörkum.

Breytingar í seinni

Staðan eftir 20 mínútur var 14-8 fyrir Ísland en Angóla skoraði ekki mark það sem eftir lifði fyrri hálfleiksins. Þessa góðu vörn nýttu strákarnir okkar ekki. Skotnýtingin var skelfileg á lokakaflanum og skoraði Ísland ekki nema tvö mörk á sama kafla og var átta mörkum yfir í hálfleik, 16-8.

Varnarleikurinn var áfram sterkur í byrjun seinni hálfleiks en Angóla skoraði ekki mark í þrettán mínútur og 42 sekúndur. Íslenska liðið náði engu að síður ekki að nýta sér þessa yfirburði og stinga algjörlega af.

Geir gerði breytingar á íslenska liðinu í seinni hálfleiknum. Aron Rafn Eðvarðsson, Gunnar Steinn Jónsson, Bjarki Már Elísson og ungu mennirnir Ómar Ingi Magnússon og Arnar Freyr Arnarsson komu inn og fengu að spila seinni 30 mínúturnar.  Aron Rafn fann sig alls ekki í markinu og eftir að fá á sig fimm mörk án þess að verja skot var Björgvin Páll sendur aftur í markið.

Framan af fyrri hálfleik fékk Ísland hvert tækifærið á fætur öðru til að drepa leikinn en krafturinn, viljinn eða gæðin voru ekki til staðar. Kæruleysið var algjört í spilamennskunni framan af í fyrri hálfleik sem sást best þegar Angólamenn skoruðu tvö mörk tveimur færri. Þegar fyrri hálfleikurinn var rétt ríflega hálfnaður voru Angólamenn búnir að skora sjö mörk á móti sex mörkum Íslands. Vægast sagt dapurt.

Leikhléið borgaði sig

Geir Sveinsson var fullmeðvitaður um hversu slök spilamennska íslenska liðsins var á þessum tímapunkti og tók þá leikhlé þar sem hann lét strákana heyra það. Geir vildi fá miklu meiri kraft og hraða í spilið sem hann og fékk þrátt fyrir að nokkur aulaleg skot láku inn í íslenska markið.

Þetta leikhlé skilaði sér því íslenska liðið vann lokakaflann með þrettán mörkum gegn fjórum og innbyrti á endanum fjórtán marka sigur, 33-19. Minnsta tap Angóla til þess er níu marka tap gegn Makedóníu en það fékk risa skelli á móti Slóveníu og Spáni.

Guðjón Valur Sigurðsson var markahæstur í íslenska liðinu í kvöld með átta mörk og Arnór Þór Gunnarsson skoraði sjö mörk úr átta skotum. Bjarki Már Elísson kom sterkur inn í seinni hálfleik og skoraði sex mörk í sjö skotum. Björgvin Páll Gústavsson varði 17 skot og var með 55 prósent hlutfallsmarkvörslu.

Staðan er núna þannig hjá strákunum okkar að þeir eru með sjö mörk í plús og þrjú stig. Þeim nægir sigur gegn Makedóníu á fimmtudagskvöldið ef Spánn vinnur Makedóníu á morgun. Okkur dugar jafntefli ef Túnis vinnur ekki Angóla með meira en 16 mörkum.




Fleiri fréttir

Sjá meira


×