Bílar

Hyundai stofnar sportbíladeildina N

Finnur Thorlacius skrifar
Hyundai i30 N verður fyrsti bíll nýrrar sportbíladeildar Hyundai.
Hyundai i30 N verður fyrsti bíll nýrrar sportbíladeildar Hyundai.
Yfirmaður nýrrar sporbíladeildar Hyundai, Albert Biermann, kemur frá BMW en þar á bæ bera sportbílar nafnið M. Næsti stafur á eftir M er N  svo það kemur því kannski ekki á óvart að nýja sportbíladeild Hyundai fái nafnið N.

Fyrsti bílinn sem koma skal frá þessari nýstofnuðu deild Hyundai verður i30 N og kemur hann á markað á næsta ári. Hann verður byggður á nýrri kynslóð i30 en núverandi kynslóð hans verður á næsta ári skipt út fyrir nýja.

Þrír slíkir bílar voru reyndar prófaðir í Nürburgring þolaksturskeppni fyrir um tveimur vikum ásamt Velostar Turbo bíl frá Hyundai og i30 1,6 Turbo, en sá bíll var sigurvegari í sínum flokki í keppninni á síðasta ári.

Undir húddinu á i30 N verður 2,0 lítra og 259 hestafla vél en engu að síður á þessi bíll að verða á afar viðráðanlegu verði. Hann mun í fyrstu aðeins fást beinskiptur en verða svo síðar í boði með sjálfskiptingu. Þessum bíl verður att gegn Ford Focus ST og Volkswagen Golf GTI og á að verða ódýrair en þeir.

Í framtíðinni verða bílar frá N-deildinni einnig í boði sem tengitvinnbílar, en ekki í fyrstu. N-sportbíladeild Hyundai er með höfuðstöðvar í S-Kóreu en er einnig með útibú í nágrenni Nürburgring brautarinnar þýsku og þar eru bílar deildarinnar prófaðir.






×