Innlent

Húsnæðishrappurinn hafði 250 þúsund krónur af spænsku ungmennunum

Jakob Bjarnar skrifar
Spænsku ungmennin munu kæra svikin en þau eiga fund með lögreglu og svo spænska sendiráðinu vegna málsins í dag.
Spænsku ungmennin munu kæra svikin en þau eiga fund með lögreglu og svo spænska sendiráðinu vegna málsins í dag.
Óprúttnir hrappar nýta sér ófremdarástand á húsnæðismarkaði til að svíkja fé af fólki. Tvö spænsk ungmenni lentu í einum slíkum á bland.is en þau voru að leita sér að húsnæði. Þau eiga fund með lögreglu í dag og hyggjast þá leggja fram kæru.

Svo virðist sem græðgisvæðingin á Íslandi sé óðum að taka á sig þá mynd að Ísland sé að breytast í Nígeríu norðursins. Valdemar G. Valdemarsson, skólastjóri Raftækniskólans, segir málið illt afspurnar fyrir Ísland. Sagan sem spænsku ungmennin hafa að segja er lygileg.

Lygavefurinn með miklum ólíkindum

„Við sáum auglýsingu á bland.is þar sem íbúð að Álftamýri 34 í Reykjavík var auglýst. Hún átti að kosta 125 þúsund krónur á mánuði,“ segir Jaime Maestre, 25 ára gamall skiptinemi en hann er hér ásamt Paulu Abad sem er 20 ára. Þau hyggjast dvelja á Íslandi í þrjá mánuði í tengslum við nám sitt.

Ungmennin spænsku svöruðu auglýsingunni og eftir nokkra daga barst svar frá manni sem sagði þeim eitt og annað af sínum högum. Að hann hefði keypt þessa íbúð fyrir dóttur sína sem var við nám í Reykjavík. En hún sé nú flutt til útlanda, hún sé að fara að eignast son og hann að verða afi. Hann var mjög ánægður með það.

Lygavefurinn var býsna þéttofinn því maðurinn sagði þeim einnig að hann væri vélstjóri og þeim væri frjálst að hafa gæludýr í íbúðinni. Sjálfur hafi hann átt hund sem honum þótti afskaplega vænt um.

Ekki bárust lyklarnir

Jaime segir að þau hafi tjáð manninum að þau hefðu áhuga á að leigja íbúðina og spurðu hvort þau gætu komið til að skoða hana? Hann sagðist vera á Ítalíu og þyrfti því að senda þeim lyklana. Hann sagði að hann þyrfti að gæta öryggis og við gætum greitt í gegnum greiðslukerfi AirBNB, sem þeim þótti afbragð.

Jaime og Paula. Lygavefurinn sem hrappurinn óf var býsna sannfærandi.
Þeim barst svo póstur þar sem merki AirBNB var að finna og leiðbeiningar um hvernig inna mætti greiðsluna af hendi. Þar kom fram að tveimur dögum eftir greiðslu myndu lyklarnir berast þeim. Ef þeim litist ekki á íbúðina fengju þau þá greiðslu endurgreidda. Allt virtist þetta í besta lagi og þeim var gert að greiða einn mánuð fyrirfram og annan í tryggingu, samtals 250 þúsund krónur.

„Við greiddum þá upphæð á föstudaginn 17. þessa mánaðar. Sá 20. rann upp og ekki bárust lyklarnir,“ segir Jaime. „Við sendum honum tölvupóst en hann svaraði honum ekki.“

Eiga fund með lögreglu og sendiráðinu í dag

Næsti dagur leið, þau sendu annan póst til mannsins og vildu grennslast fyrir um lyklana en það var sama sagan; ekkert svar.

„Við leituðum okkur upplýsinga á netinu og fundum frásögn af því þar sem fjársvikum af þessum toga var lýst. Og samskonar mynd og barst okkur var að finna og sama heimilisfang. Allt var með sama hætti. Við höfðum samband við lögregluna og bankann. Fjölskyldur okkar hafa lagt fram kvörtun frá Spáni. Við hittum lögregluna í dag og eigum fund með spænska sendiráðnu,“ segir Jaime Maestre. En þeim og Paula Abad er að vonum brugðið við að hafa lent í öðru eins og þessu – á Íslandi sem þau töldu vera öruggt hvað varðar svindl af þessu tagi.


Tengdar fréttir




Fleiri fréttir

Sjá meira


×