Húslestur um Fríðu Á. Sigurðardóttur

Vestfirskur húslestur verður í Safnahúsinu á Ísafirði kl. 14 á laugardag í umsjá þeirra Jónu Símoníu Bjarnadóttur og Elfars Loga Hannessonar. Að þessu sinni verður fjallað um rithöfundinn Fríðu Á. Sigurðardóttur en hún fæddist á Hesteyri í Sléttuhreppi 11. desember árið 1940. Hún var næst yngst 13 systkina en foreldrar hennar voru þau Stefanía Halldóra Guðnadóttir og Sigurður Sigurðsson. Um er að ræða samstarfsverkefni Kómedíuleikhússins og bókasafnsins á Ísafirði sem hófst í byrjun árs 2007.

Fríða varð student frá Menntaskólanum á Laugarvatni árið 1961 og lauk Cand mag prófi í íslensku frá HÍ 1979. Hún starfaði sem bókavörður við Háskólabókasafnið og Ameríska bókasafnið og var stundakennari við Háskóla Íslands og Kennaraskóla Íslands. Allt frá árinu 1978 voru ritstörf hennar aðalstarf en fyrsta bók hennar kom út árið 1980, smásagnasafnið Þetta er ekkert alvarlegt. Sama ár kom einnig fræðiritið Leikrit Jökuls Jakobssonar sem byggði á Cand.Mag ritgerð hennar. Í kjölfarið fylgdu svo fleiri smásögur og skáldsögur auk þýðinga.

Fríða hlaut íslensku bókmenntaverðlaunin árið 1990 fyrir bókina Meðan nóttin líður og norrænu bókmenntaverðlaunin ári síðar.

thelma@bb.is