Viðskipti innlent

Hrossasali dæmdur fyrir að svíkja 52 milljónir undan skatti

ingvar haraldsson skrifar
Sigurður var dæmdur í Hérðasdómi Reykjaness fyrir að gefa ekki upp tekjur af hrossasölu.
Sigurður var dæmdur í Hérðasdómi Reykjaness fyrir að gefa ekki upp tekjur af hrossasölu. Vísir/stefán/haraldur
Héraðsdómur Reykjaness hefur sakfellt Sigurð Vigni Ragnarsson, fyrir að gefa ekki upp 52 milljónir króna til skatts á árunum 2005 til 2010.

Héraðsdómur dæmdi Sigurð í 10 mánaða skilorðsbundið fangelsi til tveggja ára. Sigurður hefur þar að auki fjórar vikur til að greiða 104 milljónir króna til ríkissjóðs. Geri hann það ekki mun Sigurður sæta 12 mánaða fangelsi. Þá þarf hann einnig að greiða verjanda sínum 1,5 milljónir króna í málsvarnarlaun.

Sigurður er dæmdur fyrir að gefa ekki upp tekjur sínar af sína af hrossasölu á tímabilinu og greiða þar af leiðandi ekki tekjuskatt, virðisaukaskatt og útsvar vegna viðskiptanna. Þá var hann einnig sakfelldur fyrir að halda ekki bókhald um viðskiptin með hrossin.

Taldi sig ekki þurfa að gefa áhugamálið upp til skatts

Ákærði bar því við að á fyrri hluta tímabilsins, á árunum 2005 og 2006 hafi honum ekki borið að gefa tekjur sínar af sölunni upp til skatts þar sem viðskipti með hesta hafi einungis verið áhugamál hjá honum. Viðskiptin hafi hins vegar undið upp á sig og hann stofnað félagið Skúfslæk ehf. um hrossasöluna. Aðalstarf Sigurðar var rekstur fasteignasölunnar Eignamiðlun Suðurnesja en hann seldi hana í maí 2008.

Í kjölfar hrunsins segist hann hafa lent í fjárhagsvandræðum og reynt að skapa sér tekjur með viðskiptum með keppnishross. Vegna fjárhagsvandræða hans hafi rekstur hrossasölunnar aldrei farið inn í félagið Skúfslæk ehf. heldur verið á kennitölu hans sjálfs og eiginkonu hans.

Viðurkenndi brotið að mestu

Sigurður gekkst við því að hafa ekki talið fram tekjur sínar vegna viðskipta með hross á skattframtölum eða virðisaukaskattskýrslum sem hann skilaði inn. Þá gekkst ákærði einnig við því að hafa ekki greitt virðisaukaskatt, tekjuskatt eða útsvar vegna viðskipta sinna með hross.

Sigurður vefengdi ekki heldur þær tölulegu upplýsingar sem komu fram í ákærunni. Hann hélt hins vegar fram að upplýsingar um kostnað við hrossasöluna hafi vantað og hafi numið þegar mest var 100 þúsund krónum á mánuði.






Fleiri fréttir

Sjá meira


×