Hringt í erlenda starfsmenn og þeir spurðir hvort þeir séu á lífi

„Þetta er ekki mjög klókt hjá honum," segir Torfi G. Yngvason einn af eigendum Arctic Adventures um ummæli Ólafs Ragnars Grímssonar, forseta, sem hann lét falla í þættinum Newsnight í breska ríkissjónvarpinu (BBC).

Hann segir misskilningin slíkan vegna eldgossins að aðstandendur starfsmanna hans, sem eru af erlendu bergi brotnu, hringja í þau og spyrja hvort þau séu alveg örugglega ekki á lífi.

Torfi segir mikla æsifréttamennsku hafa einkennt umfjöllun fjölmiðla um gosið og tekur sérstaklega fram að íslenskir fréttamiðlar séu ekki saklausir. Áhrifin eru þau að ferðamenn eru farnir að óttast að koma til Íslands.

„Það er bara grín að sjá fréttamenn keyra í öskufallinu sem er ekki nema um þriggja kílómetra kafli á þjóðveginum," segir Torfi. Aðspurður hvort mikið sé búið að afboða ferðir til þeirra segir minna bera á því þegar litið er lengra til sumars.

Aftur á móti hefur flugbann verið í gildi og útskýrir það að ferðamenn hafa ekki komist til landsins undanfarið.

Hann bendir á að það sé áberandi að stærri hópar á vegum fyrirtækja afboði frekar ferðir hingað til lands. Hann segir að svo virðist sem eigendur fyrirtækjanna vilji ekki taka áhættuna að fara með alla starfsmenn fyrirtækis til lands þar sem þau gætu hugsanlega orðið innlyksa vegna eldgosa.

Slíkt gæti orðið gríðarlega dýrt fyrir fyrirtækin. Torfi segir litla breytingu varðandi aðra ferðamenn.

Torfi telur að það þurfi einfaldlega að skerpa á umfjöllun allra fjölmiðla og taka skýrt fram að það er engin heimsendir í vændum á Íslandi.

„Að tilkynna Bretum það að Katla fari bara að kjósa er engum til framdráttar. Fyrir utan að það er bara ekkert öruggt um það," segir Torfi sem er ekki sannfærður um að eldgos í Eyjafjallajökli og Kötlugos haldist endilega í hendur.