Innlent

Hópslagsmál á Hverfisgötu: "Það var verið að gera nautahakk úr andlitinu á honum“

Lögregla var kölluð út rétt fyrir eitt í nótt vegna hópslagsmála ofarlega á Hverfisgötu.

Akandi vegfarandi sem hringdi á lögreglu sagðist hafa séð sex til átta manna hóp sem var að deila innbyrðis með tilheyrandi öskrum og hávaða. Ein kona í hópnum var einungis klædd brjóstahaldara ofan mittis. Deilur virðast hafa magnast fljótt því skyndilega brutust út slagsmál.

„Þetta virðist aðallega hafa beinst gegn einum aðila sem lá á götunni og var verið að kýla,“ sagði vegfarandinn og bætti við: „Það var verið að gera nautahakk úr andlitinu á honum.“

Vegfarandinn snéri bifreið sinni við og þegar hann kom aftur að slagsmálunum virtist konan vera komin úr brjóstahaldaranum og því ber að ofan. Þá bar lögreglu að garði og stöðvaði slagsmálin.



Þegar blaðamaður mætti á vettvang skömmu síðar var búið að handtaka þrjá karlmenn. Einn þeirra öskraði ókvæðisorð að lögreglu og sagði meðal annars „I kill you, I fucking kill you.“ Annar af hinum handteknu lá óvígur á jörðunni en þeim þriðja hafði verið stillt upp við vegg.

Íbúi á svæðinu sagðist hafa séð tvo einstaklinga sem auðsýnilega voru undir áhrifum eiturlyfja hlaupa brott frá hópnum og inn í nærliggjandi íbúðarhús. 




Fleiri fréttir

Sjá meira


×