Innlent

Hljóp í 52 daga: „Ég trúi ekki enn að ég sé hættur að hlaupa“

Nanna Elísa Jakobsdóttir skrifar
Nirbhasa Magee hljóp í sautján klukkustundir á dag.
Nirbhasa Magee hljóp í sautján klukkustundir á dag. Vísir/Aðsend
„Ég trúi ekki enn að ég sé hættur að hlaupa,“ segir Nirbhasa Magee í samtali við Vísi. Hann kláraði lengsta götuhlaup heims, 3100 mílna hlaupið í New York, sem haldið er á vegum Sri Chinmoy Maraþonliðsins í kvöld. 3100 mílur eru um 5000 kílómetrar. Tími Nirbhasa var 51 dagur og um það bil tólf klukkustundir. Staðfestur tími á enn eftir að birtast.

Nirbhasa er Íri sem er búsettur á Íslandi og hefur starfað hér síðastliðin tvö ár.

„Mér líður eins og ég eigi að vakna á morgun og halda áfram að hlaupa.“ Nirbhasa segist ekki finna fyrir tómleikatilfinningu enn en hann segist gera sér grein fyrir því að það verði erfitt að fara úr því að reyna á þolmörk líkama síns á hverjum degi yfir í venjulegt líf. Götuhlaupið er kallað Everest götuhlaupanna enda það lengsta í heimi.

Hlaupið virkar þannig að hlauparar hlaupa í um sautján klukkustundir á dag. Til þess að klára tæplega 5000 kílómetra á 52 dögum þurfti Nirbhasa að hlaupa um 94 kílómetra á dag. Sofið er í um sex klukkustundir og pásur eru um klukkustund á hverjum degi. „Það er mjög mikilvægt að borða mikið,“ útskýrir Nirbhasa. „Ég var með hjálparteymi í kringum mig og á undirbúningsfundi fyrir hlaupið þá fórum við yfir hvað ég þyrfti að borða mikið til þess að halda í við brennsluna.“

Nirbhasa var að hlaupa þetta lengsta götuhlaup heims í fyrsta sinn í ár en hann hefur áður tekið þátt í tíu daga hlaupi, árið 2012 og 2013. Það kom honum á óvart hversu vel gekk þá en hann lenti í fjórða sæti fyrra árið og í þriðja sæti það seinna.

„Ég hef alltaf haft mikinn áhuga á hugleiðslu,“ útskýrir Nirbhasa og segist hafa tekið þátt í maraþonum og ávallt haft gaman af. Honum þykir heillandi þessi hugmynd um hugleiðslu og íþróttir.

Nirbhasa starfar hér á landi við að sjá um sjúkling með MND. „Ég hjálpa honum svo hann geti átt eins eðlilegt og gott líf og hægt er.“ Hann snýr þó ekki aftur til Ísland fyrr en í lok mánaðar. „Ég ætla að dvelja áfram í New York í einhvern tíma og leyfa líkamanum að jafna sig.“

Hér má lesa allt um hlaupið sem Nirbhasa tók þátt í.




Fleiri fréttir

Sjá meira


×