Heimilin í heljargreipum

Vísir Aðsendar greinar 22. febrúar 2012 12:59

Ólöf Guðný Valdimarsdóttir skrifar:

Ríkisstjórn Íslands færði kröfuhöfum, fjárglæframönnum, vogunarsjóðum og hrægömmum, heimili margra landsmanna á silfurfati. Kröfuhafarnir hafa haft einhliða skotleyfi á heimili og fjölskyldur sem þeir hafa ekki viljað semja við um húsnæðislán. Margar fjölskyldur hafa misst heimili sín. Nú hlýtur það að vera krafan að Ríkisstjórnin færi lánin aftur í eðlilegt viðskiptaumhverfi. Íslensk heimili eiga rétt á því. Það eru t.d. engin gömul húsnæðislán í Arionbanka! Arionbanki er innheimtustofnun fyrir Dróma hf.! Þar eru gömlu lánin! Um lán sem eru í eigu Dróma hf. getur Arionbanki ekki tekið ákvörðun! Um það hef ég staðfestingu frá yfirmanni bankans. Samt tekur Arionbanki að sér að semja um lánin og lætur eins og hann sé viðsemjandinn.

Hrægammar

Þegar Spron og Frjálsi fjársestingarbankinn voru lagðir niður var skipuð skilanefnd yfir þá. Þangað fóru húsnæðislán heimilanna sem bankarnir höfðu veitt viðskiptavinum sínum. Lán með veði í íslenskum heimilum. Skilanefndin gætir einhliða hagsmuna kröfuhafanna. Kröfurnar, lánin okkar, eru eign kröfuhafanna sem eru að stærstum hluta til erlendir vogunarsjóðir eða svokallaðir hrægammar hrunsins. Þeir sérhæfa sig í að hagnast á óeðlilegu lána- og viðskiptaumhverfi og er slétt sama um hag Íslendinga. Hvað þá um hag íslenskra heimila. Arionbanki er fyrst og fremst tæki kröfuhafanna til að innheimta sem mest frá fyrirtækjum og heimilum þessa lands upp í stökkbreyttar lánakröfur. Kröfuhafarnir munu verja sína hagsmuni hvað sem það kostar en það er enginn að verja hagsmuni íslenskra heimila gagnvart þeim.

Umboðsmaður lána heimilanna

Umboðsmaður skuldara var sett á laggirnar til að skoða sérhagsmuni fárra heimila. Um 60.000 heimili í landinu skulda meira en þau eiga. Þau eru í skuldavanda og þau eru í klóm kröfuhafanna. Það er enginn markvisst að gæta hagsmuna stærsta hluta þessara heimila nema hver og einn fyrir sig. Það þarf að breyta umboðsmanni skuldara strax í umboðsmann lána heimilanna. Embættið ætti fyrst og fremst að vinna að alhliða lausnum á skuldavanda heimilanna. Vera öðrum megin við borðið með stjórnvöldum gagnvart kröfuhöfunum hinum megin við borðið. Umboðsmaðurinn ætti að vera öflugur og vera að leita lausna á skuldavanda heimilanna almennt og semja fyrir allar fjölskyldur með húsnæðislán. Líka þær sem standa í skilum og sjá lánin sín hækka og hækka. Núna eru kröfuhafarnir/hrægammarnir öðrum megin við borðið og heimili landsins með stökkbreytt lánin, ráðalaus og óvarin, hinum megin við borðið. Stjórnvöld virðast vera algerlaga úti að aka og helst leita ráða hjá kröfuhöfunum og innheimtumönnum þeirra. Hverjir stjórna, eru einhverjir yfirhöfuð við stjórn?

Ólöf Guðný Valdimarsdóttir, arkitekt.

Til baka

Heimilin í heljargreipum

Fleiri fréttir - Aðsendar greinar

Mest lesið: Umræðan

Nýjast á Vísi

Fréttablaðið

Stöð2