Hefur unnið við sjávarútveg frá fimmtán ára aldri

Útgerðarfyrirtækið Nesver ehf. gerir út línubátinn Tryggva Eðvarðs SH frá Rifi en sá bátur er annar tveggja báta af Snæfellsnesi sem var í hópi aflahæstu báta í stærðarflokkinum 10-15 tonn í janúarmánuði. Þann mánuð færði Tryggvi Eðvarðs 158 tonn að landi. Nesver er fjölskyldufyrirtæki í eigu Ásbjörns Óttarssonar alþingismanns, Margrétar Scheving eiginkonu hans og þriggja sona þeirra. Tveir sonanna vinna við fyrirtækið, þeir Friðbjörn, sem er framkvæmdastjóri, og Gylfi sem er í beitningunni og sinnir landformennsku, eins og það var kallað áður fyrr. Þótt Friðbjörn Ásbjörnsson sé framkvæmdastjóri þessarar fjölskylduútgerðar er það ekki hans aðalstarf. Hann er aðstoðarframkvæmdastjóri Fiskmarkaðs Íslands með aðsetur í Ólafsvík.

Friðbjörn er aðeins 27 ára gamall en hefur þrátt fyrir ungan aldur víðtæka reynslu af sjávarútvegi og menntun sem nýtist honum við þau störf. „Útgerðin hefur gengið vel hjá okkur síðustu ár og það er fyrst og fremst að þakka því góða starfsfólki, sem við erum með, bæði til sjós og lands en við erum með tíu manns í vinnu. Þrjá á bátnum og sjö við beitningu. Þetta fólk hefur séð til þess að allt gengur upp.“

Sjá viðtal við Friðbjörn Ásbjörnsson framkvæmdastjóra í Skessuhorni vikunnar.