Hefur stýrt umferðarljósunum í yfir 40 ár

Fréttablaðið Innlent 04. febrúar 2012 03:30

Ingi Ú. Magnússon gatnamálastjóri réð Dagbjart Sigurbrandsson til starfa árið 1971 og setti sem skilyrði að hann mætti ekki hætta fljótlega eftir ráðningu. Við það hefur Dagbjartur staðið. Fréttablaðið/Valli

„Umferðarmenningin hefur breyst mjög mikið, og til hins betra,“ segir Dagbjartur Sigurbrandsson, sem um þessar mundir lætur af störfum hjá Reykjavíkurborg eftir að hafa stýrt umferðarljósum borgarinnar í 41 ár.

Þegar Dagbjartur hóf störf voru umferðarljós á 16 gatnamótum í Reykjavík. Sama ár tók hann þátt í að gangsetja fyrstu hnappastýrðu gangbrautarljósin, á Bústaðavegi við Grímsbæ. Rúmum fjörutíu árum síðar eru umferðarljós á 118 gatnamótum og 33 hnappastýrð ljós, auk þess sem í kerfinu hafa verið innleiddar margvíslegar tækninýjungar. Þar á meðal hraða- og umferðarljósamyndavélar.

Myndavélarnar segir Dagbjartur einmitt hafa leikið lykilhlutverk í að bæta umferðarmenninguna. „Menn fá núna fjóra punkta í ökuferilsskrá fyrir hvert brot. Svo tökum við líka myndir af þeim sem aka of hratt í gegn á grænu ljósi,“ segir hann. „Ég hef oft verið kallaður fyrir dóm í málum sem þessum,“ segir hann og bætir við að eftir að hann fékk í einu máli tíma til að útskýra tæknina á bak við myndatökuna fyrir dómaranum hafi ekki tapast mál þar sem hraða- eða ljósamynd sé notuð sem sönnunargagn. Aðhaldið hafi því leikið lykilhlutverk í að fá ökumenn til að bæta aksturslag sitt.

Núna segir Dagbjartur þýsku hraðamyndavélarnar sem í notkun eru að verða úreltar. „Það er orðið erfitt að fá í þær filmur. Við erum því að leggja út í stafræna tækni.“ Nýjar myndavélar segir hann ýmist tengdar miðlægu kerfi með ljósleiðara eða 3G net. Annars segist Dagbjartur ekki sjá eftir öðru nú við lok starfsins en að hafa ekki fengið að sjá fyrir endann á miðlægu stýrikerfi ljósa sem nú hafi verið innleitt til hálfs. „Við ætluðum að vera búin að þessu fyrir 2010 en hrunið setti strik í þann reikning.“ Hann segist hins vegar skilja sáttur við, enda búinn að vera alveg nógu lengi að. Nú sé kominn tími til að sinna hugðarefnum og fjölskyldunni, svo sem barnabörnunum sex.

olikr@frettabladid.is

Til baka

Hefur stýrt umferðarljósunum í yfir 40 ár

Fleiri fréttir - Innlent

Fréttir eftir mánuði

2012

2011

2010

2009

2008

2007

2006

2005

2004