Lífið

Hápunktur afmælisársins

Gunnþóra Gunnarsdóttir skrifar
Draumsýnin sem byggði á jafnrétti til náms lifir á þrítugasta afmælisári skólans, segir Valgerður sem situr hér aftan við nokkra af 120 nemendum Tónstofunnar. Fréttablaðið/Ernir
Draumsýnin sem byggði á jafnrétti til náms lifir á þrítugasta afmælisári skólans, segir Valgerður sem situr hér aftan við nokkra af 120 nemendum Tónstofunnar. Fréttablaðið/Ernir Vísir/Ernir
Við ætlum að gera okkur glaðan dag á morgun, sunnudag, og halda flotta tónleika í Salnum klukkan 15. Þeir eru hápunktur listviðburða sem við köllum einu nafni Hljómvang og eru haldnir í tilefni 30 ára afmælis Tónstofunnar og 20 ára afmæli Bjöllukórs hennar,“ segir Valgerður Jónsdóttir, skólastjóri Tónstofu Valgerðar.

Hún segir góða gesti koma fram á tónleikunum og nefnir Unnstein Manuel Stefánsson, nemendur úr Skólahljómsveit Austurbæjar undir stjórn Vilborgar Jónsdóttur og strengjasveit frá Tónskóla Sigursveins undir stjórn Helgu Þórarinsdóttur. Auk þess stíga að sjálfsögðu nemendahópar Tónstofunnar og Bjöllukórinn á svið.

Eins og Valgerður nefndi verður áðurnefndum afmælum fagnað með ýmsu móti á árinu. Til dæmis segir hún Bjöllukórinn ætla að gefa út hljómdisk og mynddisk undir merkjum Hljómvangs.

Í Tónstofu Valgerðar hafa forgang einstaklingar sem þarfnast sérstaks stuðnings í tónlistarnámi sínu vegna fatlana eða sjúkdóma og hafa ekki hafa greiðan aðgang að öðrum tónlistarskólum.

„Tónlistarnám stuðlar að alhliða þroska, lífsfyllingu og lífsgleði og getur rofið einangrun. Kennsluaðferðirnar hjá okkur taka mið af þörfum og óskum hvers nemanda. Þeir geta lagt stund á hefðbundið tónlistarnám og svo er alls konar tónlistariðkun í boði sem eflir alhliða tjáningarfærni og veitir sköpunarþörfinni útrás,“ segir Valgerður.

„Draumsýnin sem byggði á jafnrétti til náms lifir á þrítugasta afmælisári skólans,“ bætir hún við og segir 120 nemendur á öllum aldri skráða í skólann á þessu ári af öllu höfuðborgarsvæðinu.

Heimsóknir og ferðalög eru á döfinni hjá nemendum og kennurum Tónstofunnar. Valgerður lýsir því. „Um miðjan júní fær skólinn í heimsókn til sín kór og dansara frá lista- og menningarskóla bæjarins Gjøvik í Noregi og í lok júní mun nemendahópur frá Tónstofunni halda til Lettlands og taka þátt í Jónsmessuhátíð með hljóðfæraslætti og söng, ásamt finnskum og lettneskum nemendum sem heimsóttu okkur í október.“






Fleiri fréttir

Sjá meira


×