Formúla 1

Hamilton fljótastur á föstudagsæfingum í Ástralíu

Kristinn Ásgeir Gylfason skrifar
Lewis Hamilton sýndi að hann og Mercedes liðið unnu heimavinnuna sína í vetur.
Lewis Hamilton sýndi að hann og Mercedes liðið unnu heimavinnuna sína í vetur. Vísir/Getty
Lewis Hamilton á Mercedes var fljótastur á fyrstu æfingum tímabilsins sem fram fór í Ástralíu í nótt. Valtteri Bottas á Mercedes varð annar á fyrri æfingunni og Sebastian Vettel á Ferrari varð annar á seinni æfingunni.

Fyrri æfingin

Hamilton hafði rúmlega hálfa sekúndu í forskot á restina af ökumönnunum. Hamilton og Bottas notuðu mýkstu dekkjagerðina sem er últra-mjúk þessa helgina. Aðrir settu sína hröðustu tíma almennt á ofur-mjúku dekkjunum sem eru ögn hægari. Munurinn er því ekki alveg eins gapandi og við fyrstu sín.

Heimamaðurinn, Daniel Ricciardo á Red Bull varð þriðji á fyrri æfingunni. tveimur þriðju úr sekúndu hægari en Hamilton.

Jolyon Palmer á Renault var mikið í bílskúrnum á fyrri æfingunni. Gírkassinn var að valda vandræðum. Lukka breska ökumannsins breyttist lítið á seinni æfingunni.

Sebastian Vettel og Ferrari klæjar eflaust í kollvikin yfir hraða Mercedes liðsins.Vísir/Getty
Seinni æfingin

Vettel skipti Mercedes ökumönnunum í tvennt. Hamilton fljótastur og Bottas þriðji. Kimi Raikkonen var fjórði á Ferrari. Þar á eftir komu Red Bull ökumennirnir.

Tími Hamilton á seinni æfingunni; 1.23:620 er innan við einum tíunda úr sekúndu hægari en besti tíminn á Albert Park brautinni. Vettel á besta tímann síðan 2011. Það er met sem verður að öllum líkindum slegið í tímatökunni á morgun, að því gefnu að það verðu þurrt.

Romain Grosjean varð áttundi á Haas bílnum á seinni æfingunni líkt og þeirri fyrri.

Palmer missti stjórn á bílnum í síðustu beygjunni fyrir ráskaflann og skall á varnarvegg. Æfingin var stöðvuð tímabundið á meðan brautin var hreinsuð.

Max Verstappen tók upp á því að slá grasið í kringum brautina og skemmdi gólfið í bílnum með garðyrkjustörfunum. Hann þurfti því að vera í bílskúr Red Bull liðsins lengi og tókst ekki að fara nema átta hringi.

Fernando Alonso á McLaren veitti stuðningsmönum liðsins smá vonarglætu með því að ná 12. besta tímanum og hann ók 19 hringi.

Bein útsending frá tímatökunni hefst klukkan 5:50 í fyrramálið og keppnin verður í beinni útsendingu frá klukkan 4:30 á sunnudagsmorgun í leiftrandi háskerpu á Stöð 2 Sport. Tryggðu þér áskrift á 365.is.

Hér að neðan má sjá gagnvirkt brautarkort þar sem finna má öll helstu úrslit helgarinnar.


Tengdar fréttir

Rúnar og Kristján Einar við kristalkúluna

Formúlu 1-sérfræðingar Stöðvar 2 Sport; Rúnar Jónsson og Kristján Einar Kristjánsson stilltu upp kristalkúlunni og spáðu fyrir um úrslit á Formúlu 1 tímabilinu sem hefst í Ástralíu um helgina.

Hamilton: Ferrari bíllinn fljótastur

Þrefaldi Formúlu 1 heimsmeistarinn og ökumaður Mercedes liðsins, Lewis Hamilton segir að Ferrari bíllinn sé sá fljótasti um þessar mundir.

Ferrari sýnir klærnar og fær heimsmeistara

Nýtt tímabil í Formúlu 1 hefst snemma á sunnudagsmorgun þegar mikið breyttir bílarnir verða ræstir í Ástralíu. Gríðarlegar breytingar boða spennandi keppni. Sérfræðingur Stöðvar 2 Sport spáir endurkomu Ferrari á þessu ári.




Fleiri fréttir

Sjá meira


×