Formúla 1

Hakkinen: Get séð Bottas verða meistara með Mercedes

Kristinn Ásgeir Gylfason skrifar
Mika Hakkinen var afar vinsæll ökumaður á sínum tíma og átti marga dygga stuðningsmenn á Íslandi.
Mika Hakkinen var afar vinsæll ökumaður á sínum tíma og átti marga dygga stuðningsmenn á Íslandi. Vísir/Getty
Fyrrum tvöfaldi heimsmeistarinn í Formúlu 1, Mika Hakkinen segist geta séð fyrir sér að samlandi hans, Valtteri Bottas verði heimsmeistari með Mercedes liðinu.

Allt stefnir í þá átt að finnski ökumaðurinn sem er enn formlega á mála hjá Williams fari til Mercedes fyrir komandi tímabil. Bottas mun þar taka sæti Nico Rosberg, ríkjandi heimsmeistara. Rosberg hætti í Formúlu 1 fimm dögum eftir að hann varð meistari.

Hakkinen þekkir vel til Bottas enda hluti af umboðsteymi hans. Hakkinen hefur trú á að Bottas sé nógu góður til að berjast um titilinn og segir að áhugi Mercedes muni auka sjálfstraust Bottas.

„Staðan fyrir ökumann er aldrei betri en þegar lið vill fá þig. Sérstaklega þegar liðið er drottnandi afl í Formúlu 1 eins og Mercedes hefur verið, þetta er draumastaða,“ sagði Hakkinen í samtali við MTV3 í Finnlandi.

„Ég get séð Bottas verða heismeistara. Þegar maður kemur til liðsins sem er á toppnum og getur unnið keppnir og titla, þá er bara þitt að þróast og vinna keppnirnar og á endanum titlana,“ hélt Hakkinen áfram.

Enn á þó eftir að tilkynna hver mun aka við hlið Lewis Hamilton hjá Mercedes. Vitað er að Felipe Massa hefur ákveðið að fresta því að setjast í helgan stein til að taka sæti Bottas hjá Williams. Vænta má tilkynningar seinna í janúar.


Tengdar fréttir

Symonds: Brotthvarf Bottas hefði mikil áhrif á Williams

Tæknistjóri Williams, Pat Symonds telur að það myndi hafa mikil áhrif á liðið að missa ökumanninn Valtteri Bottas til Mercedes. Bottas þykir líklegastur til að taka laust sæti hjá heimsmeisturunum.

Pascal Wehrlein til Sauber

Varaökumaður Mercedes liðsins og keppnisökumaður Manor liðsins, Pascal Wehrlein hefur gengið til liðs við Sauber liðið. Ökumannsmarkaðurinn er að skýrast eftir brotthvarf heimsmeistarans Nico Rosberg.




Fleiri fréttir

Sjá meira


×