Viðskipti innlent

Hagnaður Íslandsbanka minnkar í 20,2 milljarða

Haraldur Guðmundsson skrifar
Hagnaður Íslandsbanka í fyrra eftir skatta nam 20,2 milljörðum króna samanborið við 20,6 milljarða árið 2015. Í afkomutilkynningu bankans segir að hagnaður ársins 2016 einkennist af sterkum grunntekjum og lokum sölu eignarhluta Borgunar í Visa Europe.

Afkoma bankans af reglulegri starfsemi var 15,1 milljarðar króna samanborið við 16,2 milljarða árið áður. Hreinar vaxtatekjur voru 31,8 milljarðar sem er fjórtán prósenta hækkun. Hreinar þóknanatekjur voru 13,7 milljarðar og jukust um 500 milljónir milli ára. Arðsemi eigin fjár var 10,2 prósent samanborið við 10,8 prósent árið 2015.

Heildareignir bankans námu í árslok 1.048 milljörðum. Útlán til viðskiptavina og lausafé voru þá 93 prósent af heildareignum. Jukust útlánin um 688 milljarða eða um 3,3 prósent. Eiginfjárhlutfall bankans var 25,2 prósent.

„Árið 2016 var mjög gott ár fyrir Íslandsbanka og einkenndist af mikilvægum áföngum í sögu bankans. Grunnrekstur bankans hélt áfram að styrkjast og tekjur voru stöðugar. Endurskipulagningu lánasafnsins er lokið, eignarhlutir í óskyldum rekstri hafa verið seldir og gæði eigna halda áfram að aukast,“ segir Birna Einarsdóttir, bankastjóri Íslandsbanka.

„Bankinn lét mikið að sér kveða á fjármagnsmörkuðum hér heima og erlendis. Helst ber að nefna útgáfu á 500 milljón evra skuldabréfi og hefur ávöxtunarkrafa bréfanna lækkað töluvert á eftirmarkaði. Í desember greiddi bankinn út sérstaka arðgreiðslu að upphæð 27 ma. kr., en heildararðgreiðslur til íslenska ríkisins á árinu 2016 voru 37 ma. kr. Með arðgreiðslunni var stigið fyrsta skrefið í átt að að hagstæðari samsetningu á eiginfjárgrunni bankans og undirbúningi að breyttu eignarhaldi.“






Fleiri fréttir

Sjá meira


×