Erlent

Hafa aftur náð Palmyra úr höndum ISIS

atli ísleifsson skrifar
Sýrlenski stjórnarherinn hefur með aðstoð rússneska flughersins aftur náð borginni Palmyra úr höndum liðsmanna hryðjuverkasamtakanna ISIS.

Stjórnarhermenn og bandamenn þeirra héldu inn í borgina í gær og í dag hafði þeim tekist að ná borginni allri á sitt vald. Frá þessu greindu talsmenn rússneska utanríkisráðuneytisins og sýrlenska stjórnarhersins í dag.

Liðsmenn ISIS sem höfðust við í Palmyra hafa nú flúið inn á svæði austur af borginni og vinna sýrlenskir stjórnarhermenn nú að því að hreinsa borgina af jarðsprengjum.

ISIS hefur tvívegis náð Palmyra á sitt vald, síðast í desember í fyrra. Þar hafa hryðjuverkasamtökin framkvæmt fjöldaaftökur í rústum hringleikahúss fornu borgarinnar og unnið þar gríðarmiklar skemmdir en borgin er á heimsminjaskrá UNESCO.

ISIS hafa misst stór landsvæði á síðustu mánuðum og er sótt að þeim út öllum áttum. Ljóst er að ekki sé þess langt að bíða að ráðist verði gegn Raqqa, höfuðvígis ISIS í Sýrlandi.




Fleiri fréttir

Sjá meira


×