Innlent

Hættuleg tröllahvönn dreifir sér í Reykjavík

Nadine Guðrún Yaghi skrifar
„Ég fór og skoðaði þá staði í gær þar sem við höfum fengið ábendingar um að plantan sé farin að dreifa úr sér víða í Vesturbænum,“ segir Snorri Sigurðsson, líffræðingur hjá umhverfis- og skipulagssviði Reykjavíkurborgar, um tröllahvönn, hættulega plöntu sem fjölgar sér víða hér á landi.

Reykjavíkurborg vinnur nú að því að kortleggja útbreiðslu plöntunnar í borginni.

Á dögunum upplýstu starfsmenn hjá Náttúrufræðistofnun Íslands borgina um að plönturnar væru í Vesturbæ Reykjavíkur. Þær fundust á göngustíg við leikskólana Ægisborg og Vesturborg og á bak við bensínstöð N1 á Ægisíðu. Þá hafa starfsmenn stofnunarinnar séð plönturnar á Reynimel og Einimel.

„Það þarf að eyða plöntunum, sérstaklega þar sem börn eru á ferðinni. Ungplönturnar líkjast venjulegum ætihvönnum svo margir gætu ruglast á þeim,“ segir Ellý Guðjohnsen, líffræðingur hjá Náttúrufræðistofnun Íslands. Ellý bætir við að hún voni að það sé ekki orðið of seint að grípa inn í.

Snorri Sigurðsson
Tröllahvönn er hættuleg vegna eitraðs safa í henni sem getur valdið alvarlegum bruna á húð. Plantan er sérstaklega hættuleg á heitum, sólríkum sumardögum þar sem sólarljósið orsakar efnabreytingu í safa plantnanna sem veldur bruna.

„Orðið tröllahvönn er samheiti yfir nokkrar plöntutegundir. Þessi sem er útbreiddust í Vesturbænum hefur ekkert íslenskt heiti enn þá. Aðrar þekktar tegundir af tröllahvönn eru til dæmis bjarnarkló,“ segir Snorri Sigurðsson, sem nú vinnur að því að kortleggja útbreiðslu plöntunnar í borginni. 

„Plönturnar sem eru í Vesturbænum eru ekkert rosalega stórar en safinn í þeim getur brennt húð ef það verður bein snerting. Þeir sem eru í mestu hættunni eru þeir sem slá gras því þá getur safinn skvest á þá í miklu magni.“

Snorri hvetur þá sem verða varir við plöntuna á einkalóð sinni að hafa samband við Reykjavíkurborg. 

Að sögn Snorra verður tekin ákvörðun um framhaldið eftir að náðst hefur að kortleggja þá staði sem plantan er á.

„Það verður að vega og meta hvernig við munum bregðast við. Það er meira en að segja það að fjarlægja plönturnar, en við stefnum á það. Þá verða leiksvæði að sjálfsögðu sett í forgang.“




Fleiri fréttir

Sjá meira


×