Sport

Gunnar Nelson orðinn einn sá besti í veltivigtinni

Henry Birgir Gunnarsson skrifar
Gunnar Nelson svaraði tapinu gegn Story með stæl.
Gunnar Nelson svaraði tapinu gegn Story með stæl. vísir/Getty
Það voru margir skíthræddir við Brandon Thatch sem Gunnar Nelson barðist við í Las Vegas. Hávaxinn og mikill rotari.

Strákur með mikið sjálfstraust. Þær áhyggjur reyndust tilhæfulausar. Gunnar undirbjó sig gríðarlega vel, fann hungrið og áhugann aftur. Hann mætti til leiks beittari en nokkru sinni fyrr.

Gunnar lærði sína lexíu í tapinu gegn Rick Story í Stokkhólmi á síðasta ári. Hann var ekki rétt stemmdur að flestu leyti. Ólíkur sjálfum sér.

Hann ætlaði ekki að gera sömu mistök tvisvar. Kom sér í besta form lífs síns og varð grimmari en áður. Hann var ótrúlega vel stemmdur gegn Thatch og það sást strax.

Rotarinn Thatch, sem átti afmæli, mátti síðan sætta sig við að vera kýldur niður. Leiftursnögg högg Gunnars og Bandaríkjamaðurinn féll eins og tré á mitt gólfið.

Gunnar stökk svo ofan á Thatch og þá var ljóst hvernig færi. Gunnar var í hlutverki kattarins að leika sér að músinni sem að lokum gafst upp.

Leiðin að sigrinum.fréttablaðið
Mér leið vel

„Mér líður stórkostlega. Þetta var klárlega einn af mínum bestu bardögum,“ sagði Gunnar óvenju brosmildur eftir bardagann. Sigurinn var sætur og hann leyfði sér að sýna tilfinningar.

„Við gerðum það sem við höfum verið að vinna með. Mér leið vel og var ánægður með þetta frá a til ö. Þetta var spurning um að finna taktinn standandi og ég fann hann. Hann sótti aðeins á mig sem var fínt því þá gat ég byrjað að lesa hann,“ segir Gunnar en honum leið mjög vel er hann komst ofan á Thatch.

Getur slegið niður með báðum

„Ég vissi að ég hafði fínan tíma og vissi þá að ég myndi klára hann. Þetta var bara spurning um að vera afslappaður. Taka sér tíma, sem ég og gerði. Hann var bara svona miðlungs í gólfinu eins og flestir sem keppa í þessum styrkleika. Ég vissi líka alltaf hvaða kraftur er í höndunum á mér. Ég get slegið menn niður með báðum höndum og þetta var bara spurning um að finna taktinn.“

Gunnar fer væntanlega inn á topp tíu listann núna og tekur á móti einum af þeim bestu næst. Þangað hefur hann stefnt.

Okkar maður fékk ótrúlegan stuðning frá írsku áhorfendunum í höllinni og afmælisbarnið Thatch, sem var á heimavelli, var í raun á útivelli.

„Írarnir fylgja Conor út um allt. Ég er búinn að berjast mikið í Írlandi og er með Írana á bak við mig. Það var auðvitað alveg frábært,“ segir Gunnar Nelson.

MMA

Tengdar fréttir

Gunnar: Gólfið er minn vígvöllur

"Þetta er það sem við höfum verið að vinna með og oft sést ekki það sem skiptir máli í bardaganum," sagði sigurreifur Gunnar Nelson við Vísi skömmu eftir bardagann í nótt.

Sjáðu Gunnar Nelson hengja Thatch

Gunnar Nelson stimplaði sig inn í Bandaríkjunum með látum þegar hann pakkaði Brandon Thatch saman á UFC189.




Fleiri fréttir

Sjá meira


×