Handbolti

Guðjón Valur: Það skiptir engu máli hvernig við komust á HM

Óskar Ófeigur Jónsson skrifar
Guðjón Valur Sigurðsson.
Guðjón Valur Sigurðsson. Vísir/Vilhelm
Landsliðsfyrirliðinn Guðjón Valur Sigurðsson er gríðarlega ánægður með fréttirnar um að íslenska handboltalandsliðið verði með á HM í Katar í janúar. Framkvæmdastjórn Alþjóðahandboltasambandsins hleypti Íslandi inn bakdyramegin á mótið í kvöld.

„Ég er bara ótrúlega glaður að geta hætt að svekkja mig á þessum Bosníuleik sem síðan skipti engu máli. Nei, nei. Þetta er bara gleði og gaman að við séum að fara á HM. En það er náttúrulega búinn að vera óþarflega mikill farsi í kringum þetta,“ sagði Guðjón Valur í viðtali við Hauk Harðarson á vefsíðu RÚV í kvöld.

„Við erum ekkert með skottið á milli lappanna heldur er það bara kassinn út og hausinn upp. Við mætum klárir til leiks og fáum góðan tíma til að undirbúa okkur. Hann verður bara nýttur vel og ég hef engar áhyggjur af öðru en að menn mætir tilbúnir og klárir," sagði Guðjón Valur og bætti við:

„Sambandið er bæði búið að leggja mikla vinnu og mikinn pening í það að halda okkar máli gangandi og ég held að það sé að skila okkur þessu núna. Ég alveg klár á því að menn vilji spili fyrir Íslands hönd á HM," sagði Guðjón Valur.

„Það skiptir engu máli hvernig við komust á HM. Við erum þarna og þá erum við þarna til að spila og ná árangri burt séð frá því hvort við komum inn á "wild cardi", fáum sætið gefins eða vinnum okkur fyrir því þá höfum við alveg jafnmikinn þátttökurétt og aðrar þjóðir," sagði Guðjón Valur.

„Við erum að hugsa um HM og viljum standa okkur þar en þetta er líka mikilvægt í að halda okkur inni á stórmótunum því þar viljum við vera," sagði Guðjón Valur. Hvernig heldur hann að Svíþjóð og Frakkland taki því að fá Ísland inn í riðilinn í staðinn fyrir Sameinuðu arabísku furstadæmin?

„Ég var að tala við Nikola Karabatic áðan. Hann samgladdist mér en var ekki glaður fyrir hönd Frakka eða hinna liðanna í riðlinum. Það skiptir okkur engu máli eða hvernig hinar þjóðirnar líta á þetta miðað við það hvernig IHF hefur hagað sér í þessu máli," sagði Guðjón Valur og útskýrði það frekar.

„Við vitum það að við töpuðum fyrir Bosníu og áttum ekki að fara á mótið en svo fór einhver farsi í gang þar sem var vísvitandi reynt að halda okkur frá HM þangað til að það var ekki lengur hægt. Við lítum svo á að það eru þjóðir sem eru að detta út eða ætluðu ekki að fara á HM. Þá eigum við rétt á því að koma inn sem varaþjóð Evrópu," sagði Guðjón Valur.

„Það eru mýmörg dæmi um það að þjóðir hafi staðið sig vel þegar þær hafa komið inn á síðustu stundu eins og Danir í fótboltanum þegar þeir urðu Evrópumeistarar. Við gerðum það líka á Ólympíuleikunum 1992. Við getum því litið í söguna og vonað að það hjálpi okkur," sagði Guðjón Valur.

„Ef við komum með því hugarfari að það sé verið að gefa okkur eitthvað þá er það ekki þannig. Við erum bara á leiðinni á HM og höfum alveg jafnmikinn rétt og heimsmeistararnir. Við erum þarna og verðum þarna til þess að standa okkur. Við lítum bara til framtíðar," sagði Guðjón Valur.

Möguleikar Íslands um að komast inn á Ólympíuleikana í Ríó 2016 aukast mikið með því að fá að vera með á HM í Katar en þar eru sæti í boði þangað inn.

„Við getum spilað okkur inn í undankeppnina á þessu móti en við erum ekki að farna þarna til þess að tryggja okkur inn á Ólympíuleika. Við erum að fara þangað til þess að spila gott HM. Það er númer eitt, tvö og þrjú. Við eigum ekki að hugsa um önnur mót heldur fyrst og fremst um þetta mót," sagði Guðjón Valur.


Tengdar fréttir

Ísland verður með á HM í Katar | Ísland og Sádí-Arabía fá lausu sætin

Íslenska handboltalandsliðið verður með á HM í handbolta í Katar í janúar eftir allt saman en þessi óvænta ákvörðun var tekin á fundi Framkvæmdastjórnar IHF í Þýskalandi í dag samkvæmt óstaðfestum heimildum íþróttadeildar 365 . Íslenska landsliðið fær sæti í C-riðli með Svíum og Frökkum.

Guðmundur B. Ólafsson: Ég þarf ekki að tala Aron Pálmarsson til

Aron Pálmarsson verður með íslenska landsliðinu á HM í handbolta í Katar þrátt fyrir ummæli í vikunni um að hann nennti ekki að koma inn á HM sem einhver varaþjóð. Formaður HSÍ hefur engar áhyggjur af því að Aron verði ekki klár í verkefnið en Ísland fékk í dag sæti á HM í Katar í janúar.




Fleiri fréttir

Sjá meira


×