Grísku stjórnarflokkarnir ósammála um aðgerðir
Poul Thomsen frá Alþjóðagjaldeyrissjóðnum, Matthias Mors frá framkvæmdastjórn ESB og Klaus Masuch frá Seðlabanka ESB ganga af fundi með Lucas Papademos, forsætisráðherra Grikklands, í gær.Fréttablaðið/AP
Gríska stjórnin verður að fallast á þessar aðgerðir, eða sýna með öðrum hætti hvernig hún ætlar sér að draga meira saman í ríkisfjármálum, ætli hún sér að fá frekari fjárhagsaðstoð frá ESB og AGS upp á 130 milljarða evra.
Næstu stóru gjalddagar ríkisskuldanna verða í mars. Fái Grikkir ekki peningana frá ESB og AGS geta þeir ekki greitt af skuldunum, og þar með verður gríska ríkið komið í greiðsluþrot.
Grísk stjórnvöld hafa undanfarna viku átt í ströngum viðræðum, ekki bara við fulltrúa AGS og ESB, heldur einnig við fulltrúa lánardrottna sinna. Lúkas Papademos forsætisráðherra hefur auk þess staðið í ströngu við að fá stjórnarflokkana til að koma sér saman um aðgerðir, en íhaldsflokkurinn Nýtt lýðræði hefur þverneitað að fallast á kröfur um enn frekar launalækkanir hjá ríkisstarfsmönnum og fleiri uppsagnir í opinbera geiranum.
Mikil andstaða hefur verið, jafnt meðal þingmanna sem alls almennings, við kröfurnar frá ESB og AGS. Samdráttur hefur verið í grísku efnahagslífi fimm ár í röð. Nærri tvö ár eru síðan gríska ríkið byrjaði að draga saman seglin með ströngum aðhaldsaðgerðum, sem bitnað hafa illa á öllum almenningi. Þær aðgerðir hafa ekki dugað til að koma ríkisfjármálum á réttan kjöl.
Atvinnuleysið er nærri 20 prósent og flest heimili eiga í miklum erfiðleikum með að ná endum saman. Þolinmæði Evrópusambandsins virðist hins vegar vera á þrotum. Þjóðverjar beita grísk stjórnvöld hörðum þrýstingi og nú um helgina vildi Claude Juncker, leiðtogi ríkjahóps evrusvæðisins, ekki lengur útiloka þann möguleika að Grikkland verði hreinlega gjaldþrota.
Antonis Samaras, leiðtogi íhaldsmanna, sagði í gær að lánardrottnar Grikklands séu að „biðja um meiri kreppu, sem landið getur ekki þolað. Ég er að berjast með öllum tiltækum ráðum gegn þessu“.
Georg Papandreú, leiðtogi sósíalista, er sömuleiðis andvígur sumum af þeim kröfum, sem Grikkjum er gert að uppfylla. Hann er á móti því að laun verði lækkuð og vill að ríkið taki að sér rekstur bankanna, að minnsta kosti tímabundið.
Viðræðum verður haldið áfram á morgun í von um að takast megi að koma saman einhvers konar málamiðlun á síðustu stundu.
gudsteinn@frettabladid.is
- Fréttir
- Sport
- Viðskipti
- Lífið
Fréttir eftir mánuði
Hér má finna fréttir eftir mánuði.
- Sími 512 5000
- Hafðu samband
- Starfsfólk
- Umferð
- Veftré
- Auglýsingar
- 365 Skaftahlíð 24 105 Reykjavík Sími: 512 5000