Lífið

Glysprófíll og gagnleg ráð

Lilja Katrín Gunnarsdóttir skrifar
Lífið kíkir á það helsta sem er að gerast á samfélagsmiðlum í dag en þar kennir ávallt ýmissa grasa.

Facebook

Useful DIY

Hver elskar ekki að breyta gömlum hlutum og gefa þeim nýtt hlutverk? Eða föndra eitthvað gagnlegt inn á heimilið og búa þannig til minningar?

Á þessari Facebook-síðu er hægt að fá óteljandi hugmyndir að verkefnum sem hægt er að framkvæma sjálfur, jafnt stór sem smá. Þá erum við ekki aðeins að tala um verkefni fyrir handlagna heldur einnig ljúffengar uppskriftir að vinsælum réttum.

Tæplega fjögur hundruð þúsund manns líkar við síðuna og eru aðdáendur hennar óhræddir við að láta í sér heyra og gefa hver öðrum góð ráð við framkvæmd hinna ýmsu verkefna.

Instagram

Mert Alas

Mert Alas er annar helmingur ljósmyndaradúósins Mert og Marcus. Mert og Marcus, sem heitir fullu nafni Marcus Piggott, kynntust fyrst á Englandi árið 1994 og hafa síðan þá unnið saman að einhverju leyti.

Í dag eru þeir þekktastir fyrir að taka myndir af kraftmiklum konum og hafa unnið fyrir tímarit á borð við bandaríska og ítalska Vogue, W og Pop.

Kúnnar þeirra eru til dæmis tískurisarnir Louis Vuitton, Missoni, Giorgio Armani, Roberto Cavalli og Fendi.

Mert deilir hinu og þessu úr lífi sínu á Instagram, þar á meðal myndum af stórvinkonum sínum Kate Moss og Naomi Campbell. Sannkallaður glysprófíll.

Pinterest

Indian Makeup and Beauty Blog

Makeupandbeauty.com er með kröftuga Pinterest-síðu þar sem hægt er að fá ýmis ráð og hugmyndir að förðun.

Indian Makeup and Beauty Blog, betur þekkt sem IMBB, var stofnað árið 2009 og er nú eitt stærsta bloggsvæði heims en rúmlega sjö hundruð pennar starfa fyrir bloggið.

Metnaður stofnendanna Rati og Sanjeev er að hafa Pinterest-síðuna og bloggið mjög fallegt og stílhreint og hefur það vakið athygli um heim allan. Á Pinterest-síðunni er ekki aðeins um indverska förðun að ræða, þótt nafnið gefi annað til kynna, heldur sitt lítið af hverju úr heimi fegurðar.






Fleiri fréttir

Sjá meira


×