Viðskipti innlent

Glitnir á 963 milljarða upp í skuldir

Jón Hákon Halldórsson skrifar
Hlutur bankans í snjóhengjunni er 313 milljarðar íslenskra króna.
Hlutur bankans í snjóhengjunni er 313 milljarðar íslenskra króna.
Eignir slitabús Glitnis banka nema tæplega 963 milljörðum íslenskra króna en kröfurnar nema 2.271 milljarði króna. Búið á því um það bil 42 prósent upp í kröfur. Við það bætast um 80 milljarðar króna sem forgangskröfuhafar hafa þegar fengið greiddar. Neikvætt eigið fé hefur farið úr 1.417 milljörðum króna í lok árs 2013 í 1.322 milljarða í lok síðasta árs.

Þetta kom fram á kynningu á kröfuhafafundi í gær, en glærur frá kynningunni voru birtar á vef bankans í gær. Stærstur hluti eigna bankans er handbært fé og samsvarar það 660,5 milljörðum í íslenskum krónum. Næststærsti hlutinn er eign í Íslandsbanka sem nemur tæplega 175 milljörðum króna.

Samtals nema krónueignir 313,6 milljörðum króna. Að frádregnum eignarhlutnum í Íslandsbanka nema krónueignir því um 138 milljörðum króna. Eignir í evrum samsvara tæplega 232 milljörðum króna og eignir í dollurum samsvara 163 milljörðum króna. Eignir í norskum krónum samsvara rúmum 99 milljörðum og eignir í breskum pundum 98 milljörðum.

„Þessir 313 milljarðar eru okkar hluti í snjóhengjunni,“ segir Kristján Óskarsson, framkvæmdastjóri Glitnis. Ef Íslandsbanki yrði seldur fyrir erlent fé þá stæðu eftir 138 milljarðar í íslenskum krónum sem þyrfti þá að leysa með einhverjum öðrum hætti. „Þess vegna skiptir afar miklu máli að geta selt Íslandsbanka fyrir erlent fé,“ segir Kristján.

Kristján segir jafnframt að það sé mikilvægt að átta sig á því að það fé sem er erlendis hefur aldrei komið til Íslands og hefur ekkert með íslenskt efnahagskerfi að gera. Þó það yrði borgað út þá myndi það ekki hafa nein áhrif á Íslandi.






Fleiri fréttir

Sjá meira


×