Enski boltinn

Getur Danny Drinkwater leyst vandamál enska landsliðsins inni á miðjunni?

Ingvi Þór Sæmundsson skrifar
Drinkwater er mikilvægur hlekkur í liði Leicester.
Drinkwater er mikilvægur hlekkur í liði Leicester. vísir/getty
Martin Samuel, pistlahöfundur hjá Daily Mail, segir að Danny Drinkwater, leikmaður Leicester City, geti leyst vandamál enska landsliðsins inni á miðjunni.

Þótt Jamie Vardy og Riyad Mahrez hafi verið mest í sviðsljósinu í vetur hefur Drinkwater átti afbragðs gott tímabil og átt stóran þátt í frábæru en óvæntu gengi Leicester sem er með fimm stiga forskot á toppi ensku úrvalsdeildarinnar.

Drinkwater, sem er uppalinn hjá Manchester United, lék 16 leiki fyrir yngri landslið Englands á sínum tíma en hefur aldrei leikið fyrir A-landsliðið og líklega aldrei komið til greina í það. Þrátt fyrir þetta segir Samuel að Drinkwater geti hjálpað enska liðinu á EM í Frakklandi í sumar.

Samuel segir að England eigi nóg af góðum skapandi miðjumönnum en fáa sem geti sinnt varnarhlutverkinu inni á miðjunni.

„(Jack) Wilshere er alltaf meiddur, og þetta er hans hlutverk. (Fabian) Delph, Michael Carrick, Jordan Henderson, Jonjo Shelvey, Tom Cleverley og Ryan Mason eru ekki nógu góðir,“ skrifar Samuel og bætir við: „Þessir leikmenn myndu ekki komast í neitt af bestu liðunum á EM. Eric Dier stóð sig vel í vináttulandsleiknum gegn Frakklandi í nóvember en það er erfitt að lesa of mikið í þann leik.“

Klæðist Drinkwater enska landsliðsbúningnum á nýjan leik?vísir/getty
Umræddur Drinkwater hefur leikið 23 af 25 deildarleikjum Leicester á tímabilinu, skorað eitt mark og lagt upp fjögur. Samkvæmt tölfræðinni vinnur hann 2,8 tæklingar að meðaltali í leik og nær boltanum (e. interception) 1,4 sinnum að meðaltali í leik.

„Hann hefur verið frábær á þessu tímabili,“ segir Samuel um Drinkwater og hrósar honum sérstaklega fyrir frammistöðuna í 1-3 sigrinum á Manchester City á Etihad á laugardaginn.

Samuel segir Drinkwater búi yfir öllum þeim eiginleikum sem góður varnarsinnaður miðjumaður þurfi að búa yfir.

„Hann er duglegur og kraftmikill og með gott stöðumat,“ segir Samuel sem hefur greinilega mikið álit á Drinkwater sem hefur verið í herbúðum Leicester frá 2012.

Pistil Samuels má lesa í heild sinni með því að smella hér.


Tengdar fréttir




Fleiri fréttir

Sjá meira


×