Innlent

Garðabær vill kaupa Vífilsstaðalandið

Sveinn Arnarsson skrifar
Á Vífilsstöðum var rekinn berklaspítali sem hóf starfsemi 1910.
Á Vífilsstöðum var rekinn berklaspítali sem hóf starfsemi 1910. vísir/heiða
Fulltrúar fjármálaráðuneytisins og Garðabæjar hafa fundað fimm sinnum um möguleg viðskipti með land Vífilsstaða síðustu mánuði. Enginn kjörinn fulltrúi hefur setið umrædda fundi heldur aðeins bæjarstjóri og bæjarritari.

Af hálfu fjármála- og efnahagsráðuneytisins hafa starfsmenn þeirrar skrifstofu ráðuneytisins sem farið hefur með eignamál ríkisins setið fundina. Áslaug Hulda Jónsdóttir, formaður bæjarráðs Garðabæjar, segir bæjarstjóra hafa leitt þessar samningaviðræður fyrir hönd bæjarins. Ekki hefur hins vegar verið ákveðið hvernig nýta eigi landið komi til þess að sveitarfélagið kaupi landið.

Fundað var í ágúst, september og desember og segir í skriflegu svari ráðuneytisins að Garðabær vilji kaupa landið. Síðustu ár hefur verið heimild í fjárlögum Alþingis til þess að selja jörðina komi nægilega gott boð í hana að mati ráðuneytisins.

Áslaug Hulda Jónsdóttir, formaður bæjarráðs Garðabæjar.
„Framangreindir fundir milli ráðuneytisins og sveitarfélagsins hafa snúist um áhuga sveitarfélagsins á að eignast land í eigu ríkisins innan marka sveitarfélagsins. Fundirnir hafa verið upplýsingafundir sem byggst hafa á vilja sveitarfélagsins að standa fyrir uppbyggingu til framtíðar á hluta Vífilsstaðalandsins. Á fundunum hefur verið farið yfir þær hugmyndir sem hvor aðilinn um sig hefur til slíkrar uppbyggingar og hvernig rétt sé að verðleggja slík svæði verði af sölu þeirra til sveitarfélagsins,“ segir í svari fjármála- og efnahagsráðuneytisins við fyrirspurn Fréttablaðsins.

Fundargerðir eða minnisblöð eru ekki til í ráðuneytinu um téða fundi ríkisins með Garðabæ um möguleg kaup sveitarfélagsins á landi Vífilsstaða og er virði eignanna ekki ákveðið. „Einstakir fundarmenn hafa tekið niður persónulega minnispunkta í tengslum við viðræðurnar en ekki hafa verið haldnar formlegar eða sameiginlegar fundargerðir eða sérstök minnisblöð skrifuð eftir hvern fund,“ segir í svari ráðuneytisins.

„Þetta eru vinnubrögð meirihluta Garðabæjar í hnotskurn. Umræða hefur verið lítil sem engin í bæjarstjórn eða bæjarráði um málið og enginn rökstuðningur fyrir því á hvaða forsendum Garðabær ætlar sér að kaupa landið,“ segir María Grétarsdóttir, bæjarfulltrúi Lista fólksins. „Til að mynda hefur Sjálfstæðisflokkurinn neitað okkur um áheyrnarfulltrúa í skipulagsnefnd bæjarins og er það ekki í anda góðrar stjórnsýslu.“

Fréttin birtist fyrst í Fréttablaðinu




Fleiri fréttir

Sjá meira


×