Enski boltinn

Gagnrýndi Stóra Sam fyrir fornaldarfótbolta en segir hann nú rétta manninn fyrir England

Tómas Þór Þórðarson skrifar
José Mourinho og Sam Allaryce hafa mæst margsinnis í ensku úrvalsdeildinni.
José Mourinho og Sam Allaryce hafa mæst margsinnis í ensku úrvalsdeildinni. vísir/getty
José Mourinho, knattspyrnustjóri Manchester United, telur að Sam Allardyce sé rétti maðurinn fyrir enska landsliðið á þessum tímapunkti en hann þarf að fá stuðning í starfinu.

Stóri Sam verður tilkynntur sem nýr þjálfari enska landsliðsins á næstu dögum en honum er ætlað að byggja upp lið sem getur náð alvöru árangri á HM 2018 og væntanlega á EM 2020 þar sem enskir vona að ungt lið sitt blómstri.

Mourinho gagnrýndi Allardyce harkalega fyrir hálfu þriðja ári síðan þegar hann var stjóri West Ham. Hamrarnir lögðu rútunni með stæl í deildarleik gegn Chelsea og náðu stigi með markalausu jafntefli.

Portúgalinn var ansi pirraður á blaðamannafundi eftir leikinn og sakaði Allardyce um að spila 19. aldar fótbolta. Orð Mourinho voru borin undir Stóra Sam á blaðamannafundi hans eftir sama leik og hló hann dátt að þeim portúgalska.

Nú er annað hljóð í Mourinho sem hefur trú á Allardyce og fagnar því að þessi þrautreyndi þjálfari fái tækifæri með stórliði. Hann hefur áður þjálfað Bolton, Blackburn, West Ham, Newcastle og nú síðast Sunderland í ensku úrvaldeildinni.

„Þetta er ykkar land og þið eruð ansi flókið land þegar kemur að þeim sem fær þetta starf,“ sagði Mourinho aðspurður um málið á blaðamannafundi sínum í Sjanghæ í Kína þar sem Manchester United er í æfingaferð.

„Ég tel hann rétta manninn í starfið, já. Þetta er gott val en hann þarf stuðning og mér finnst þið geta gert betur þegar kemur að því.“

„Sam hefur aldrei fengið stóra tækifærið. Hann hefur mikla reynslu í ensku úrvalsdeildinni en aldrei með stórliði. Nú fær hann tækifæri og ég tel hann meira en tilbúinn. Hann hvetur menn áfram og getur ávallt búið til góðan liðsanda. Ég óska honum alls hins besta,“ sagði José Mourino.


Tengdar fréttir

Stóri Sam tekur við enska landsliðinu

Sam Allardyce verður arftaki Roy Hodgson hjá enska landsliðinu í fótbolta sem hefur ollið vonbrigðum á síðustu tveimur stórmótum.

Bruce ræddi við enska knattspyrnusambandið

Svo virðist sem Steve Bruce, knattspyrnustjóri Hull City, komi til greina sem næsti landsliðsþjálfari Englands en hann ræddi við enska knattspyrnusambandið í gær.

Steve Bruce vill fá að þjálfa enska landsliðið

Englendingar eru enn að leita sér að nýjum landsliðsþjálfara eftir ófarirnar á móti Íslandi á EM í Frakklandi. Valið stendur nú á milli Steve Bruce og Sam Allardyce samkvæmt heimildum Sky Sports.




Fleiri fréttir

Sjá meira


×