Innlent

Gæti skapað sátt um hvað það kostar að lifa

Haraldur Guðmundsson skrifar
Mikil umræða hefur verið um útreikninga á útgjöldum heimila til matarkaupa sem finna má í frumvarpi fjármálaráðherra um breytingar á virðisaukaskatti.
Mikil umræða hefur verið um útreikninga á útgjöldum heimila til matarkaupa sem finna má í frumvarpi fjármálaráðherra um breytingar á virðisaukaskatti. Vísir/GVA
„Umræðan síðustu daga sýnir hversu mikilvægt það er að ný neysluviðmið verði reiknuð út því það myndi tryggja að við værum öll að miða við sömu tölurnar og kæmi í veg fyrir eitthvað misræmi í kerfinu,“ segir Elsa Lára Arnardóttir, þingmaður og fyrsti flutningsmaður þingsályktunartillögu um að ráðist verði í endurskoðun á útreikningi neysluviðmiða fyrir íslensk heimili.

Elsa Lára Arnardóttir
Í tillögunni er Eygló Harðardóttur, félags- og húsnæðismálaráðherra, falið að hefja vinnu við útreikning nýrra neysluviðmiða. Þau eigi að innihalda þá þætti sem núverandi viðmið byggjast á en einnig húsnæðiskostnað heimila. 

Elsa segir umræðuna í fjölmiðlum síðustu daga, um útgjöld heimila til matarkaupa, sýna hversu mikilvægt það sé að ráðist verði í könnun á raunframfærslukostnaði einstaklinga og fjölskyldna í landinu. 

„Ég tel mjög brýnt að það myndist sátt um það hvað við þurfum virkilega að eiga til að geta lifað á Íslandi í dag. Sem dæmi hefur komið fram í fjölmiðlum að talsverður munur er á milli útreikninga á matarkostnaði. Það væri til bóta ef við gætum leitað í tölu sem væri sú rétta um þennan kostnaðarlið sem öll heimili þurfa að bera.“

Hugmyndin að tillögunni kom að sögn Elsu til vegna athugasemda forystumanna verkalýðshreyfingarinnar og Hagsmunasamtaka heimilanna.

„Þeim þótti mikilvægt að gerðar yrðu breytingar á útreikningum neysluviðmiðanna, og að húsnæðiskostnaðurinn færi inn í þær tölur, því við þurfum jú öll að eiga þak yfir höfuðið,“ segir Elsa og tekur fram að tillagan miði við allan kostnað sem fellur til vegna eigin húsnæðis- eða leiguhúsnæðis.

Elsa og fimm aðrir þingmenn Framsóknarflokksins lögðu tillöguna fram á þingi í síðasta mánuði. Hún er nú í umsagnarferli í velferðarnefnd Alþingis. 

„Ég er vongóð um að málið nái í gegn á þingi. Ég sit ekki í nefndinni en veit að það eru einhverjir aðilar búnir að skila inn umsögnum þar sem tekið er undir orð mín, og annarra Framsóknarmanna sem að þessu koma, um að þetta sé mjög brýnt. Því fleiri jákvæðar umsagnir því líklegra er að tillagan komist í gegn,“ segir Elsa. 




Fleiri fréttir

Sjá meira


×