Gæta þarf varúðar til að koma í veg fyrir sig og mengunarslys

Vegagerðin hefur boðið út ný- og endurlögn Vestfjarðavegar, frá Eiði við Vattarfjörð og vestur fyrir Þverá í Kjálkafirði. Verkinu verður skipt upp í þrjá verkhluta. Í einum þeirra felst ný- og endurlögn Vestfjarðavegar austan við Eiði að Þverá í Kjálkafirði. Í öðrum verkhluta felst smíði 160 metra langrar brúar í Mjóafirði og í síðasta verkhlutanum felst smíði 116 metra langrar brúar í Kjálkafirði. Framkvæmdirnar eru í tveimur sveitarfélögum, Reykhólahreppi og Vesturbyggð.

Sá kafli Vestfjarðavegar sem útboðið tekur til er 15,88 kílómetra langur. Tengingar við aflaðga vegi eða einkavegi eru sjö og gert er ráð fyrir tveimur áningarstöðum. Vegurinn verður með 7,8 metra breiðu bundnu slitlagi og verður breikkaður í beygjum þar sem radíus er 400 metrar að minni. Þá verða axlir brekkaðar þar sem vegriða er talin þörf. Frá þessu er greint í Framkvæmdafréttum Vegagerðarinnar.

Þar segir m.a. að útreikningar á stæðni vegfyllingar í Mjóafirði, sé fyllt frá landi á hefðbundinn hátt, leiði í ljós að öryggi gegn skriði verði lágt. Miklar líkur eru á að setlögin á botninum láti undan þunganum og fyllingin skríði fram eða brotni. Því skal fylla í fjörðinn með því að sigla með efnið og sökkva því til botns þar til fyllingin hefur náð upp tilsettu marki. Þegar fyllingin hefur náð a.m.k. hæð undirstöðu eða þeirri hæð ofar, sem verktaki kýs að sigla með efni, skal fyllingin hækkuð frá landi og skal keyra út eins lágri fyllingu og sjávaraðstæður leyfa og hún síðan hækkuð þegar niðurstöður sigmælinga sýna að það sé óhætt.

Gerð hefur verið sigspá á grundvelli upplýsinga fengnum úr borunum. Meðalsig á byggingartíma er talið verða um 1,2 m í Mjóafirði en um 1,0 m í Kjálkafirði. Langtímasig í báðum fjörðum reiknast um 0,1 m til viðbótar næstu áratugi. Heildarmagn sigs í Mjóafirði er áætlað um 40.000 m³ og í Kjálkafirði um 50.000 m³.

Þá skal verktaki halda raski á gróðri og jarðvegi í lágmarki. Skeringar og námur skulu ekki opnar lengur en nauðsyn krefur. Við allan frágang skal hafa í huga að draga, eins og kostur er, úr áhrifum vindálags á lausan jarðveg. Röskuð svæði skulu sléttuð í samræmi við landslag og halla umhverfisins. Brúnir efnistökusvæða og skeringa skulu aðlagaðar að landinu í kring og gerðar ávalar. Við allan frágang skal þess gætt að ekki myndist vatnsuppistöður í skeringum.

Jarðvegi og gróðri skal haldið til haga og jafnað yfir röskuð svæði eins fljótt og kostur er. Afnám á grónum skeringar- og námusvæðum skal tvískipta þannig að svarðlagi, efstu um 0,2 m þykku lagi, skal haldið aðskildu frá annarri mold eða moldarblönduðu efni. Eftir jöfnun skeringar- og námusvæða verður mold og moldarblönduðu efni jafnað yfir svæðin og að lokum verður svarðlagi jafnað yfir og þannig leitast við að ná upp grenndargróðri.

Engum nýjum svæðum má raska á varptíma fugla, frá byrjun maí fram í lok júlí. Verktaki þarf að haga verkum með hliðsjón af þessu ákvæði.

Bjóðendum er bent á að framkvæmdasvæðið nýtur verndar. Sá hluti vegarins, sem er í Reykhólahreppi, er á náttúruminjaskrá. Sá hluti vegarins, sem er neðan flóðmarka á stórstreymi er innan svæðis, sem verndað er skv. lögum um vernd Breiðafjarðar. Gæta þarf fyllstu varúðar til að koma veg fyrir mengunarslys. Líklegt má telja að helsta hætta á mengunarslysi á framkvæmdatíma, umfram þá sem almenn umferð getur valdið, tengist olíu, s.s. áfyllingu olíu á vélar og tæki, olíuleka frá tækjum og að glussi leki niður bili glussaslöngur. Verktaki er því hvattur til að sinna viðhaldi og eftirliti með markvissum hætti til að lágmarka þessa áhættu.

Tilboð verða opnuð þriðjudaginn 27. mars en verkinu skal að fullu loki
1. september 2015.

Framkvæmdafréttir Vegagerðarinnar.

thelma@bb.is