Körfubolti

Meistararnir í Golden State réðu ekki við heitasta lið NBA-deildarinnar í dag

Óskar Ófeigur Jónsson skrifar
Stephen Curry allt annað en sáttur eftir að dæmd var villa á hann í leiknum í nótt.
Stephen Curry allt annað en sáttur eftir að dæmd var villa á hann í leiknum í nótt. AP//Eric Gay
Denver Nuggets varð í nótt annað lið í Vesturdeildinni á eftir Golden State Warriors til að tryggja sér sæti í úrslitakeppninni. Golden State tapaði á sama tíma á móti San Antonio Spurs. Tveir framtíðarmenn voru með þrennu í svakalegum framlengdum leik milli Dallas Mavericks og New Orleans Pelicans.





DeMar DeRozan skoraði 26 stig og LaMarcus Aldridge var með 23 stig og 13 fráköst þegar San Anontio Spurs vann 111-105 sigur á meisturum Golden State Warriors. Þetta var níundi sigurleikur Spurs liðsins í röð.

San Anontio Spurs komst fyrir vikið upp í fimmta sætið í Vesturdeildinni en þar hjálpaði að Oklahoma City Thunder tapaði á sama tíma fyrir Miami Heat.

Stephen Curry byrjaði rólega en skoraði 25 stig og Kevin Durant var með 24 stig. Warriors-liðið er nú við hlið Denver Nuggets í toppsæti Vesturdeildarinnar.

Golden State byrjaði leikinn illa þar sem Curry og Klay Thompson klikkuðu saman á ellefu fyrstu skotunum. Warriors kom sér aftur inn í leikinn en heimamenn höfðu betur.

„Þetta er heitasta liðið í NBA-deildinni í dag og augljóslega vel þjálfað. Þeir tóku réttari ákvarðanir en við og voru betur þjálfaðir. Þeir áttu skilið að vinna,“ sagði Steve Kerr, þjálfari Golden State eftir leikinn.

„Strákarnir eru að spila betur. Við erum að reyna að bæta okkur í varnarleiknum. Samskiptin eru betri og nú er bara runninn upp sigurtíminn. Ég held að allir finni það,“ sagði LaMarcus Aldridge hjá Spurs.





Nikola Jokic var með 21 stig og 13 fráköst þegar Denver Nuggets vann 114-105 endurkomusigur á útivelli á móti Boston Celtics en með honum tryggði Denver-liðið sér sæti í úrslitakeppninni.

Will Barton var með 20 stig fyrir Denver sem verður með í úrslitakeppninni í fyrsta sinn síðan á 2012-13 tímabilinu. Þetta var fjórði sigur liðsins í röð.

Kyrie Irving var stigahæstur hjá Boston með 30 stig en Al Horford var með 20 stig, 6 fráköst og 6 stoðsendingar.









Dirk Nowitzki komst upp fyrir Wilt Chamberlain og upp í sjötta sætið yfir stigahæstu leikmenn NBA-sögunnar en náði ekki að gera nóg til að hann menn í Dallas Mavericks lönduðu sigri á móti New Orleans Pelicans.

Pelíkanarnir unnu 129-125 eftir framlengdan leik þar sem Elfrid Payton var með þrennu í fimmta leiknum í röð. Payton var með 19 stig, 11 stoðsendingar og 10 fráköst í nótt.





Elfrid Payton var ekki eini maðurinn með þrennu því slóvenski nýliðinn Luka Doncic skilaði 29 stigum, 13 fráköstum og 10 stoðsendingum í leiknum.

Mikilvægasti maðurinn var þó kannski Julius Randle sem skoraði 11 af 30 stigum á síðustu 3:29 í venjulegum leiktíma þegar New Orleans Pelicans tókst að koma leiknum í framlengingu.





Goran Dragic og Dwyane Wade halda áfram að koma öflugir inn af bekknum en þeir voru atkvæðamestir í sigri Miami Heat á Oklahoma City Thunder. Goran Dragic var með 26 stig og 11 stoðsendingar og Dwyane Wade skoraði 25 stig. Það hjálpaði Miami liðinu að Thunder lék án Russell Westbrook. Paul George var stigahæstur hjá OKC með 31 stig.

Jeremy Lin skoraði 20 stig þegar Toronto Raptors vann 128-92 sigur á New York Knicks og Fred VanVleet bætti við 13 stigum og 12 stoðsendingum.  Toronto varð hins vegar fyrir miklu áfalli í leiknum þegar bakvörðurinn Kyle Lowry meiddist illa á ökkla. Lowry var þá kominn með 15 stig og 8 stoðsendingar á 26 mínútunum.

Kyle Lowry hefur verið slæmur í vinstri ökklanum en meiddi sig nú á þeim hægri. Toronto náði með þessum sigri að vinna 50 leiki fjórða tímabilið í röð.





Úrslit leikja í NBA-deildinni í nótt:

Portland Trail Blazers - Indiana Pacers    106-98   

Phoenix Suns - Chicago Bulls    101-116   

Dallas Mavericks - New Orleans Pelicans    125-129 (110-110)   

Oklahoma City Thunder - Miami Heat    107-116   

San Antonio Spurs - Golden State Warriors    111-105   

Boston Celtics - Denver Nuggets    105-114   

Toronto Raptors - New York Knicks    128-92   

Cleveland Cavaliers - Detroit Pistons    126-119   

Washington Wizards - Utah Jazz    95-116    

NBA



Fleiri fréttir

Sjá meira


×