Innlent

Margir búnir að grínast með að gagnaverið myndi aldrei koma

Kristján Már Unnarsson skrifar
Valgarður Hilmarsson, umsjónarmaður gagnaversverkefnis.
Valgarður Hilmarsson, umsjónarmaður gagnaversverkefnis. Stöð 2/Einar Árnason.
Um eitthundrað manns vinna um þessar mundir að smíði gagnavers á Blönduósi. Framkvæmdirnar hafa hleypt miklu fjöri í athafnalíf í Húnavatnssýslum. Þetta kom fram í fréttum Stöðvar 2. 

Ráðamenn á Blönduósi voru búnir að ræða um gagnaver í tólf ár. 

„Og margir búnir að gera grín að því að þetta sé eitthvað sem muni aldrei koma. En það er bara komið núna,“ segir Valgarður Hilmarsson, umsjónarmaður gagnaversverkefnis og fyrrverandi sveitarstjóri.

Gagnaverið rís suðaustan við Blönduósbæ, sem sést fjær.Stöð 2/Einar Árnason.
Fyrsta skóflustungan var tekin síðastliðið vor og hafa framkvæmdir verið keyrðar mjög hratt frá því í haust. Gagnaverið rís um þrjá kílómetra utan við Blönduós og eru byggingarnar teknar jafnóðum í notkun.

„Og búið að byggja hérna núna tæplega fjögurþúsund fermetra í sjö húsum. Það eru komin sjö hús af átta,“ segir Valdimar O. Hermannsson, sveitarstjóri Blönduósbæjar.

Valdimar O. Hermannsson, sveitarstjóri Blönduósbæjar.Stöð 2/Einar Árnason.
„Fyrstu áhrifin voru nú bara jákvæðni sem fylgir því að eitthvað er að gerast. Og það var nú tilfellið að íbúum fjölgaði nú bara strax við fyrstu ákvörðun, sko,“ segir Valgarður. 

„Það má segja að þetta sé okkar svona snyrtileg stóriðja hérna á svæðinu og er að skapa störf. Hér hafa verið um og yfir hundrað manns að vinna við uppbygginguna síðastliðna þrjá mánuði. Og það er ekki bara af Blönduóssvæðinu heldur úr sýslunum hér í kring, Skagafirði og alveg suður á Reykjanes,“ segir Valdimar sveitarstjóri.

.

Smíði gagnaversins fór á fullt í haust.Stöð 2/Einar Árnason.
„Þannig að það er mikill uppgangur. Þetta þýðir gistingu, matarsölu, þjónustu og annað slíkt,“ segir sveitarstjórinn. 

Rafmagnsverkstæðið Átak er dæmi um fyrirtæki á Blönduósi sem hefur margfaldast að stærð vegna framkvæmdanna.

Sigurgeir Þór Jónasson, rafmagnsverkfræðingur hjá Átaki ehf. á Blönduósi.Stöð 2/Einar Árnason.
„Árið 2012 voru tveir starfsmenn, 2015 kemur þriðji, held ég. Við erum komnir núna upp í ellefu stöðugildi hjá okkur. Svo erum við með þarna tólf undirverktaka hjá okkur, sem eru allir að vinna uppfrá,“ segir Sigurgeir Þór Jónasson, rafmagnsverkfræðingur hjá Átaki. 

Áætlað er að í gagnaverinu verði milli tuttugu og þrjátíu föst störf. En verður það til heilla fyrir Blönduós og nærsveitir? 

Sjö af átta byggingum gagnaversins eru risnar. Hnjúkar í baksýn.Stöð 2/Einar Árnason.
„Það er orðið til heilla og verður til ennþá meiri heilla. Það er ekki spurning,“ svarar Valgarður Hilmarsson. 

Hér má sjá frétt Stöðvar 2:

 


Tengdar fréttir

Samstarf um öfluga atvinnuuppbyggingu í Austur-Húnavatnssýslu

Ragnheiður Elín Árnadóttir skrifaði í dag undir viljayfirlýsingu fyrir hönd ríkisstjórnar Íslands um samstillt átak stjórnvalda og sveitarfélaga í Austur-Húnavatnssýslu um eflingu atvinnulífs og sköpun nýrra starfa með nýtingu raforku sem framleidd er í Blönduvirkjun.

Segir ríkið þurfa stórar fjárfestingar í gagnaverum

Greenstone ehf.hefur undanfarin ár unnið að byggingu stórs gagnavers á Blönduósi með hátt í 120 framtíðarstörfum. Sveinn Óskar Sigurðsson fyrrverandi talsmaður Greenstone segir að þau áform hafi nú verið lögð til hliðar.

Byrjað að reisa gagnaver á Blönduósi

Gagnaver Borealis Data Center verður tekið í notkun síðla hausts ef framkvæmdir ganga vel á Blönduósi. Mikil lyftistöng fyrir atvinnulíf á NV-landi.

Vilja gagnaver á Blönduós

Alþingi hefur samþykkt þingsályktunartillögu um eflingu atvinnulífs í Húnaþingi eystra. Horft til byggingar gagnavers svo hægt sé að nýta á hagkvæman hátt orku frá Blönduvirkjun. Bæjarstjórinn er því vongóður um að gagnaver rísi á Blönduósi.




Fleiri fréttir

Sjá meira


×