Innlent

Leita íslensks manns í Dublin

Samúel Karl Ólason skrifar
Jón Þröstur Jónsson.
Jón Þröstur Jónsson.
Lögreglan í Dublin hefur lýst eftir Jóni Þresti Jónssyni, sem hvarf þar í borg um helgina. Jón er 41 árs gamall og sást síðast í Whitehall um klukkan ellefu á laugardagsmorgun. Lýst var eftir honum á Facebook í kvöld.

Samkvæmt lögreglunni í Dublin var Jón ásamt unnustu sinni í ferðalagi í Dublin. Enn sem komið er segir lögreglan ekki tilefni til að áætla að eitthvað glæpsamlegt hafi átt sér stað.

Sveinn H. Guðmarsson, talsmaður Utanríkisráðuneytis Íslands, segir mál sem tengist mannshvarfi á Írlandi vera komið á borð borgaraþjónustu ráðuneytisins. Hann vildi þó ekki staðfesta að um mál Jóns væri að ræða.

Fyrst var sagt frá málinu á vef DV. Þar segir einnig að hann hafi verið í Dublin með unnustu sinni og hann hafi farið af hóteli þeirra, símalaus, á laugardagsmorgun. Þar segir einnig að fjölskylda Jóns sé á leið til Írlands á morgun.



Í tilkynningu lögreglunnar segir að Jón hafi verið klæddur í svartan jakka, hann sé með stutt brúnt hár og um 190 sentimetrar á hæð.




Fleiri fréttir

Sjá meira


×