Skoðun
Benedikt Sveinsson byggingastjóri.

Húsnæði sem býður hættu heim

Benedikt Sveinsson skrifar

Mikil óheillaþróun hefur orðið í nýbyggingum það sem af er þessari öld. Byggingahraði er of mikill sem getur komið niður á gæðum húsnæðis. Eitt slíkt dæmi er fjölbýlishúsið Bogabraut 952 á Ásbrú í Reykjanesbæ. Frágangur á fjölbýlishúsinu er ekki í samræmi við reglugerðir og uppfyllir ekki eldvarnir, votrými né hljóðvist.

Húsið var byggt 1969 en það var hluti af húsakosti varnarliðsins. Þar voru tíu íbúðir fyrir yfirmenn í hernum. Höfðu íbúðirnar verið stækkaðar um aldamótin vegna komu yfirmannanna til landsins. Við framkvæmdirnar sem málið varðar voru íbúðirnar minnkaðar og þeim fjölgað í 22. Íbúðirnar eru ætlaðar á almennan markað. Á vef fasteignasölu má sjá dæmi um íbúð sem er til sölu í húsinu.

Ég sem byggingarstjóri hússins fól byggingarfulltrúa Reykjanesbæjar að óska eftir því við eigandann að fenginn yrði múrarameistari að múrverkinu. Skömmu síðar var mér sagt upp sem byggingarstjóra. Það voru gerðar verulegar breytingar á húsnæðinu. Hlaðnir voru 24 veggir og leiddi skoðun í ljós að aðeins þrír þeirra voru rétt unnir. Þessir þrír voru hlaðnir upp undir steypta loftaplötu. Hinir voru aðeins hlaðnir upp að niðurteknu gifslofti. Á þeim stöðum er hvorki verið að uppfylla brunakröfu né hljóðvist á milli íbúða.

Jafnframt eru á 12 stöðum í húsinu hlaðnir rakavarnarveggir. Þeir hafi í öllum tilfellum verið hlaðnir að niðurteknu gifslofti en hefðu átt að hlaðast að steyptri loftaplötu. Það ásamt öðrum ágöllum valdi því að mikil hætta sé á myglu í öllum votrýmum hússins.

Eigandi hússins þvertók fyrir að hafa tvöfalt, niðurtekið gifsloft á þriðju hæð í samræmi við brunakröfur. Ég fór þá leið að fá eiganda til að samþykkja breytta hönnun á brunavarnarkerfi sem tengist stjórnstöð. Það gekk þó eftir.

Ég var ekki boðaður í stöðumat þegar skipt var um byggingarstjóra, eins og lög gera ráð fyrir. Byggingarstjórar bera enda ábyrgð á eftirliti með framvindu verksins.

Byggingarfulltrúi Reykjanesbæjar hefur ekki sinnt athugasemdum heldur lætur það viðgangast að íbúðirnar séu kláraðar án þess að þessir meingallar séu lagaðir.

Þeir skipta gríðarlegu máli varðandi öryggi og hollustu. Það er ekki hægt að láta svona galla óhreyfða. Kostnaðurinn við að laga úr áðurnefndum ágöllum hleypur á nokkrum milljónum. Það er hins vegar deginum ljósara að það er ekki hægt að láta fólk kaupa og búa í húsnæði sem er ekki í samræmi við reglugerðir og uppfyllir ekki eldvarnir, votrými né hljóðvist. Slíkt húsnæði býður einungis hættu heim.

Benedikt Sveinsson byggingarstjóri



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Skoðun

Sjá meira


Velkomin á Vísi. Þessi vefur notar vafrakökur. Sjá nánar.