Erlent

Bandaríkjamenn reyna að koma vistum til Venesúela

Andri Eysteinsson skrifar
Blaðamannafundur var haldinn stuttu eftir komuna til Kólumbíu
Blaðamannafundur var haldinn stuttu eftir komuna til Kólumbíu EPA/Schneyder Mendoza
Bandarískar herflugvélar lentu í dag í bænum Cucuta á landamærum Venesúela og Kólumbíu. Flugvélarnar eru svar bandarískra yfirvald við ákalli þingforsetans Juan Guaidó, sem lýsti nýverið sjálfan sig forseta til bráðabirgða, um að ríki aðstoði Venesúela og færi þeim hjálpargögn og vistir. Reuters greinir frá. Tvær af þremur áætluðum vélum hafa lent í Cucuta.

Ástandið í Venesúela hefur verið eldfimt undanfarið. Miklir efnahagslegir örðugleikar hafa hrjáð ríkið og rekja flestir ástandið til stjórnar sósíalistans Nicolas Maduro sem gegnt hefur embætti forseta landsins frá andláti læriföður síns Hugo Chavez árið 2013. Mikil verðbólga hefur verið í landinu og matar- og lyfjaskortur hefur leikið íbúa grátt.

Sjá einnig: Vargöld í Venesúela: Hvað gengur Bandaríkjunum til

Maduro sór í janúar embættiseið að nýju eftir kosningar sem stjórnarandstaðan hefur kallað ólöglegar. Í kjölfar þess lýsti þingið því yfir að Juan Guaidó væri réttur forseti landsins. Fjöldi vestrænna ríkja, þar með talin Ísland og Bandaríkin hafa lýst yfir stuðningi við Guaidó.

Forsetinn Nicolás Maduro gefur lítið fyrir aðstoð Bandaríkjamanna og sakar þá um að leynimakk. Maduro hefur skipað venesúelska hernum að vera á verði fyrir þessu hernaðarbrölti Bandaríkjanna, eins og hann kýs að kalla það.

Herinn hefur til að mynda lokað fyrir ýmsar leiðir inn í landið, til dæmis hafa gámar verið settir þvert yfir vegi nærri landamærunum. Maduro hefur ekki leyft flugvélum sem bera með sér hjálpargögn og vistir að lenda í ríkinu. Því hefur verið leitað til nærliggjandi svæða og hafa stöðvar til að safna saman hjálpargögnum verið opnaðar í Kólumbíu, Brasilíu og víðar.

Í bænum Cucuta, þar sem flugvélarnar lentu í dag, talaði Mark Green, stjórnandi hjá Þróunarstofnun Bandaríkjanna (USAID) við fjölmiðla. Green sagði Guaidó hafa óskað eftir aðstoð vegna ástandsins í landinu sem versnaði með hverjum deginum.

„Börn svelta og nær öll sjúkrahús landsins glíma við alvarlegan lyfjaskort“ sagði Green.

Ástandið hefur nú, samkvæmt Green, áhrif á álfuna í heild sinni en ekki bara Venesúela. Vegna ástandsins hafa um þrjár milljónir flúið Venesúela í leit að betra lífi.

Starfsmenn úr röðum Guaidó sögðu að unnið væri að því að semja við brasilísk stjórnvöld, með það að markmiði að herflugvélar fengu þar lendingarleyfi. Einnig verður flogið með vistar frá Miami til hollensku eyjarinnar Curacao í Karíbahafi. Enn er þó óvíst hvort vistirnar komist inn í landið.

Eins og áður sagði hefur Maduro látið loka fyrir leiðir inn í landið og mun ekki hleypa sendingunum inn fyrir landamærin. Guaidó hefur þó biðlað til hermanna um að sýna umburðarlyndi og stöðva ekki sendingarnar.

Guaidó áætlar að aðgerðir til að flytja vistirnar inn í Venesúela hefjist 23. febrúar næstkomandi, til aðstoðar hefur Guaidó hundruð þúsunda sjálfboðaliða.


Tengdar fréttir

Bandaríkjastjórn í viðræðum við venesúelska herinn

Bandaríkjastjórn á í viðræðum við nokkra einstaklinga innan venesúelska hersins en markmiðið er að fá herinn til að snúa baki við Nicolas Maduro sem hefur gegnt embætti forseta Venesúela frá árinu 2013.

Lofar því að neyðaraðstoð berist

Juan Guaido sjálfskipaður leiðtogi Venesúela fullvissaði tugþúsundir stuðningsmanna sinna á fjöldafundi í gærkvöldi að hjálparaðstoð muni berast til landsins, þrátt fyrir að Maduro forseti hafi hingað til komið í veg fyrir birgðaflutningana.

Allt útlit fyrir að Evrópuríki viðurkenni Guaidó sem forseta

Fastlega er gert ráð fyrir því að Bretland, Frakkland, Þýskaland og fjöldi annarra Evrópuríkja viðurkenni Juan Guaidó sem sitjandi forseta Venesúela á morgun, hafi Nicolas Maduro, forseti ríkisins, ekki boðað til kosninga fyrir morgundaginn.




Fleiri fréttir

Sjá meira


×