Innlent

Svarið við ófærð að fá vélsleðamenn á hótelið

Kristján Már Unnarsson skrifar
Hópur vélsleðamanna framan við Hótel Djúpavík.
Hópur vélsleðamanna framan við Hótel Djúpavík. Mynd/Hótel Djúpavík.
Hótel Djúpavík er orðinn stærsti vinnustaður Árneshrepps en líður fyrir það að vegurinn þangað er ófær yfir háveturinn. Svar ráðamanna hótelsins er að gera út á vélsleðamenn. Þetta kom fram í fréttum Stöðvar 2 og þættinum „Um land allt“. 

Djúpavík er þekktust fyrir gömlu síldarverksmiðjuna, sem starfrækt var til ársins 1956. En fyrst viljum við fá á hreint hvernig heimamenn beygja nafnið. 

-Segið þið „í Djúpavík“ eða „í Djúpuvík“? 

„Djúpavík“ svarar Ásbjörn Þorgilsson, staðarhaldari í Djúpavík.

Frá Djúpavík. Síldaverksmiðjan fjær. Hótelið er í rauða húsinu næst, kvennabragganum.Stöð 2/Egill Aðalsteinsson.
Þau Eva Sigurbjörnsdóttir oddviti og Ásbjörn fluttu þangað árið 1985 og breyttu fljótlega kvennabragganum í hótel, sem jafnframt hefur verið þeirra heimili. 

„Við erum í herbergi númer eitt. Svo var dóttir okkar í herbergi númer tvö, yngri sonurinn í herbergi þrjú og eldri sonurinn í herbergi fjögur,“ segir Eva.

Eva Sigurbjörnsdóttir, fyrrverandi hótelstjóri og oddviti Árneshrepps.Stöð 2/Egill Aðalsteinsson.
Frægð Djúpavíkur jókst eftir að Hrafn Gunnlaugsson tók upp myndina „Blóðrautt sólarlag“ árið 1976 en svo kom Hollywood. 

„Það var verið að taka Justice League hérna fyrir tveimur árum og svo hafa Sigurrós haldið hérna tónleika,“ nefnir Eva en þau hafa hýst meðal annarra leikarann Viggo Mortensen.

Þetta norska skemmtiferðaskip kom tvisvar til Djúpavíkur í fyrrasumar.Mynd/Hótel Djúpavík.
Og nú er þetta fræga eyðiþorp orðið fjölmennasti vinnustaður Árneshrepps og vekur kannski von um að byggðin eigi sér framtíð. Á sumrin eru allt að tólf starfsmenn á hótelinu en fjórir yfir veturinn. 

„Við eigum þvílíka mergð af fastagestum, sem koma hérna ár eftir ár, eða annaðhvert ár, - alveg heilu fjölskyldurnar, - aftur og aftur,“ segir Ásbjörn.

Ásbjörn Þorgilsson, staðarhaldari í Djúpavík.Stöð 2/Egill Aðalsteinsson.
En eru ferðamenn að koma meira og minna allt árið? 

„Þegar er opinn vegurinn þá kemur fólk,“ svarar Eva. 

Vandinn er að núna um miðjan febrúar er ófært en reglur Vegagerðarinnar segja að ekki eigi að moka fyrr en eftir 20. mars. 

„Í raun og veru geri ég ekki annað en að hafna ferðamönnum um að koma hingað á veturna út af vegasamgöngum,“ segir Magnús Karl Pétursson, tengdasonur þeirra Evu og Ásbjörns, sem tekinn er við sem hótelstjóri.

Magnús Karl Pétursson hótelstjóri.Stöð 2/Egill Aðalsteinsson.
Þau hafa brugðist við með því að gera út á vélsleðamenn. 

„Þeir koma þá yfir fjallið frá Hólmavík. Við sjáum um að hýsa þá og gefa þeim að borða og drekka. Svo förum við með þá daginn eftir upp á jökul og norður fyrir. Þetta hefur alveg slegið í gegn,“ segir Magnús en þau fengu í fyrravetur 180 manns á sleðum.


Tengdar fréttir




Fleiri fréttir

Sjá meira


×