Menning

Harpa Ósk heillaði gamla hetjutenórinn upp úr skónum

Jakob Bjarnar skrifar
Harpa Ósk má vel við una en hún er einhver glæsilegasta söngkona sem Kristján hefur séð.
Harpa Ósk má vel við una en hún er einhver glæsilegasta söngkona sem Kristján hefur séð. fbl/stefán/ernir

Kristján Jóhannsson tenór, einhver þekktasti og besti söngvari Íslands fyrr og síðar, sparar ekki lofið um Hörpu Ósk Björnsdóttur sönkonu, en hún var valin Rödd ársins í söngkeppninni Vox Domini sem fram fór um síðustu helgi. Þar var Kristján staddur enda tóku nemendur hans þátt í keppninni.

„Ég varð ofsalega hrifinn af ungri konu sem söng, man ekki ættarnafnið en hún heitir Harpa, bæði mjög falleg, flott, góður flutningur og glæsirödd sem er eitthvað sem ég hef ekki heyrt hér í að minnsta kosti tuttugu ár. Já, Harpa Ósk Björnsdóttir,“ sagði Kristján Jóhannsson sem var ásamt Völu Matt gestur útvarpsþáttarins Bítið í morgun.

Kristján segir þetta einstakt, slík rödd kemur ekki fram nema með áratuga millibili. Sjálfur var hann ánægður með sinn hlut en nemendur hans, Jóhann Schram Reed og Guðmundur Karl Eiríksson góða hluti í keppninni og Kristján metur framtíðina í söngnum góða á Íslandi. Allt er þetta fólk sem er undir þrítugu.

Kristján lék á als oddi í viðtalinu, sem svo oft áður og kom víða við en þau Vala voru mætt í þáttinn til að ræða fréttir vikunnar. Kristján notaði tækifærið til að koma þessu að, en minnti á að ungt fólk megi ekki halda að allt komi upp í hendurnar á því. Það þurfi að hafa fyrir hlutunum. Sjálfur hafi hann farið um land allt til að koma sér á framfæri. Þetta er allt í hausnum á manni.

„Það er sagt að heimskur maður geti ekki sungið vel,“ sagði Kristján. Og benti á að margir eru kallaðir en fáir útvaldir. Þeir séu ekki nema svona um 50 söngvarar sem tilheyra úrvalsdeildinni og eru að syngja í stærstu húsunum. Nú séu hann og Kristinn Sigmundsson, þessir karldrumbar eins og Kristján orðar það, búnir að gösla þetta í 40 ár og tímabært að unga fólkið fari að láta að sér kveða.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.