Veiði

Eystri Rangá vinsælust hjá Lax-Á

Karl Lúðvíksson skrifar
Jóhann Davíð með vænan Blöndulax
Jóhann Davíð með vænan Blöndulax Mynd: JDS

Nú styttist heldur betur hratt í að veiði hefjist á ný og veiðileyfasalar fara ekki varhluta af því þessa dagana.

Lax-Á hefur lengi verið einn af stærstu veiðileyfasölum landsins og er úrval veiðisvæða hjá fyrirtækinu mjög breitt þar sem allir ættu að finna eitthvað við sitt hæfi. "Vinsælasta laxasvæðið mun vera Eystri Rangá en svo er Blanda alltaf vinsæl og Stóra Laxá á sér tryggan aðdáendahóp, Ásgarður í Soginu hefur rokið upp í vinsældum eftir mögur ár" segir Jóhann Davíð Snorrason í samtali við Veiðivísi.  "Í silungnum er Ásgarður í Soginu mjög vinsæll og fleiri og fleiri eru að uppgötva hvað það svæði getur verið skemmtilegt" bætir Jóhann við.

Eftirspurn eftir veiðileyfum er ívið meiri hjá Lax-Á en síðasta ár og hafa margir bent á að sökum lélegrar veiði í SKotlandi eru Evrópskir veiðimenn farnir að líta oftar til Íslands sem áfangastaðar fyrir lax. "Eystri er vinsæl af því þar er von á afar góðri veiði og umgjörð er öll góð. Blanda er þekkt fyrir stóran kraftmikinn lax og góða veiði, hún er mjög fjölbreytt og geymir marga dásamlega veiðistaði. Stóra Laxá er algjörlega sér á báti í íslenskri flóru, gullfallegt veiðisvæði sem getur gefið vel en á það til að vera dyntótt. Ásgarður er afar krefjandi en skemmtilegt svæði og þar er alltaf von á þeim stóra" segir Jóhann.

Þegar Jóhann er inntur eftir svari við spurningunni hvert best geymda leyndarmálið sé af veiðisvæðum Lax-Á er svarið fljótt að koma. "Það er svæði 4 í Stóru Laxá sem er með fallegri veiðisvæðum í heimi og svo er svæði 4 í Blöndu bæði fallegt og getur gefið ævintýralega góða veiði". Jóhann spáir góðu sumri og þá sérstaklega uppgangi í Rangánum, eins að Blanda og Svartá eigi eftir að hrökkva vel í gang.
 



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.