Bílar

„Lyklalausar“ bifreiðar berskjaldaðri en menn héldu

Sveinn Arnarsson skrifar
Nissan Qashqai var einn af þessum bílum þar sem hægt var að ræsa vélina með þessari tækni.
Nissan Qashqai var einn af þessum bílum þar sem hægt var að ræsa vélina með þessari tækni.
Mikill fjöldi bílgerða, þar á meðal bifreiðar sem eru með þeim mest seldu í Evrópu, eru nokkuð berskjaldaðar fyrir því að hægt sé að stela þeim vegna þeirrar tækni að hægt er að ræsa bifreiðina með því að þrýsta á hnapp í stað þess að ræsa hana með lykli eins og hefur tíðkast síðustu áratugina.

Þjófnaður á bílunum fer þannig fram að ákveðin tækni er notuð til að komast inn í þá útvarpstíðni sem bifreiðin notar til að nema „lykilinn“ sem oftast nær er aðeins notaður til að opna bílinn en þarf að vera inni í bílnum til að hægt sé að ræsa vélina. Með þessari tækni er þá hægt að „blekkja“ bílinn, ef svo má að orði komast, og ræsa vélina. Þetta kemur fram í breskum miðlum.

Gögn frá breska ríkisútvarpinu sýna að bílþjófnaðir í Bretlandi hafi aukist á síðustu árum. Einnig hefur félag þýskra bifreiðaeigenda látið rannsaka málið og komist að þeirri niðurstöðu. Af 237 bifreiðum voru 234 bifreiðar næmar eða berskjaldaðar fyrir tækninni og hægt var að stela þeim. Ford Fiesta og Ford Focus, Nissan Qashqai og Volkswagen Golf eru fjórar af fimm mest seldu bíltegundum á Bretlandseyjum. Allar þessar gerðir voru berskjaldaðar fyrir þessari gerð innrásar í bílana og hægt var að ræsa vélar þeirra með þessari tækni.

Hér á Íslandi hefur á síðustu mánuðum komið upp mál sem lögreglan hefur þurft að skoða sem tengjast þjófnuðum úr bílum þar sem ein tegund bifreiða varð sérstaklega fyrir valinu á bíræfnum þjófum. Einnig hefur Volkswagen Golf verið vinsæll meðal bílaleigubíla hin síðari ár og því mikið af slíkum bifreiðum á götum landsins.

Nýjustu bílarnir af þeirri gerð eru einmitt þannig að ekki þarf lykil til að ræsa vélina. Nægjanlegt er að fjarstýringin sé inni í bifreiðinni þegar vélin er ræst með fjarstýringu.






×