Innlent

Samgönguráðherra efast um að fjármunir fáist í R-leiðina

Kristján Már Unnarsson skrifar
Sigurður Ingi Jóhannsson samgönguráðherra.
Sigurður Ingi Jóhannsson samgönguráðherra. Stöð 2/Egill Aðalsteinsson.
Sigurður Ingi Jóhannsson samgönguráðherra efast um að nægir fjármunir fáist í svokallaða R-leið Vestfjarðavegar. Sveitarstjórn Reykhólahrepps hyggst taka ákvörðun um veglínu á morgun. Fjallað var um málið í fréttum Stöðvar 2. 

Samgönguráðherra notaði fyrri hluta dags til að funda um Vestfjarðaveg með helstu hagsmunaaðilum, fulltrúum Vesturbyggðar, Tálknafjarðar og hreppsnefnd Reykhólahrepps, en hún frestaði ákvörðun um leiðarval í síðustu viku til að heyra sjónarmið ráðherrans. Fulltrúar sumarhúsaeigenda á eyðijörðunum Hallsteinsnesi og Gröf, sem Teigsskógur teygir sig um, hittu einnig ráðherra og þeir eru grjótharðir.

Gunnlaugur Pétursson er talsmaður sumarbústaðaeigenda sem berjast gegn vegagerð um Teigsskóg.Stöð 2/Egill Aðalsteinsson.
„Ég skil ekki hversvegna Vegagerðin vill eyðileggja Teigsskóg. Þetta er nú talið vera stærsta skóglendi á Vestfjörðum sem ennþá er ósnortið. Og það þarf bara að koma í veg fyrir það einfaldlega,“ segir Gunnlaugur Pétursson, talsmaður sumarhúsaeigenda í Teigsskógi. 

En hvaða leið vilja sumarbústaðaeigendur? 

„Að fara þá leið sem er náttúruvænust. Við teljum að það sé jarðgangaleið undir Hjallaháls, til dæmis bara í 110 metra hæð,“ svarar Gunnlaugur. 

Fulltrúar Reykhólahrepps vildu ekkert tjá sig að loknum fundinum með samgönguráðherra.

Fulltrúar Reykhólahrepps í anddyri samgöngu- og sveitarstjórnaráðuneytisins í morgun.Stöð 2/Egill Aðalsteinsson.
Ráðherrann sér ekki fyrir sér að pólitískur vilji verði til þess að bæta við fjármunum í dýrari R-leið ofan á þá 25 milljarða króna, sem þegar eru markaðir sunnanverðum Vestfjörðum á næstu 7-8 árum. 

„25 milljarðar til sunnanverðra Vestfjarða, þar af tæpir sjö í Vestfjarðaleiðina, eru miklir fjármunir og mér finnst ólíklegt að það sé hægt að finna þá annarsstaðar. Og ég get ekki séð að það sé hægt að pikka þá upp neinstaðar annarsstaðar öðruvísi en að það komi niður á framkvæmdum í öðrum landshlutum, sem ég held að sé ekki endilega samstaða um,“ segir Sigurður Ingi.

Hreppsnefnd Reykhólahrepps hyggst ákveða á morgun hvaða leið verður sett inn á aðalskipulag. Leið I er sýnd með rauðum lit en vestari hluti hennar, yfir Gufufjörð og Djúpafjörð, er sá sami og ÞH-leiðar.Grafik/Guðmundur Björnsson.
Óformlegar þreifingar hafa verið milli Vegagerðarinnar og Reykhólahrepps um hvort þriðja leiðin, kölluð I-leið, gæti verið einhverskonar málamiðlun eða jafnvel varakostur, ef Teigsskógarleiðin stöðvast í málaferlum. Forsendan er sú að hreppurinn gefi út framkvæmdaleyfi fyrir ÞH-leiðinni, hugsanlega tvískipt, þannig að hægt verði að byrja strax á vestari hlutanum með því að brúa Gufufjörð og Djúpafjörð.

Hér sést veglínan um Teigsskóg í vestanverðum Þorskafirði. I-leið færi um austanverðan fjörðinn með brú á móts við eyðibýlið Laugaland.Grafík/Vegagerðin.
Reynist austari hlutinn um Teigsskóg ófær vegna dómsmála verði sveigt í I-leið með brú á nýjum stað yfir Þorskafjörð og með vegi um austanverðan fjörðinn. Þessi lausn er hinsvegar sama marki brennd og R-leiðin; að vera mun dýrari en ÞH-leiðin, 3-4 milljörðum, og óvíst hvort meiri sátt næðist um það umhverfisrask sem henni fylgdi.

 

 

Veglína yfir Gufufjörð, samkvæmt ÞH-leið og I-leið.Grafík/Vegagerðin.
Ráðherrann vill velja þá leið sem stystan tíma tekur. 

„Sú sem myndi væntanlega stystan tíma taka er sú sem menn hafa hingað til verið mest sammála um að sé öruggur láglendisvegur, og sem er ódýrastur og sem fjármagnið dugar til að framkvæma.“ 

-Sem er ÞH-leið um Teigsskóg? 

„Sem er ÞH-leiðin.“ 

-Og styður þú hana? 

„Já, ég hef stutt hana,“ svarar Sigurður Ingi Jóhannsson. 

Hér má sjá frétt Stöðvar 2: 


Tengdar fréttir

Afhentu undirskriftir gegn R-leið um Reykhólahrepp

Sveitarstjóra Reykhólahrepps var í morgun afhentur undirskriftalisti 95 einstaklinga þar sem mótmælt er að svokölluð R-leið verði valin fyrir framtíðarvegstæði Vestfjarðavegar. Aðstandendur undirskriftanna telja að meirihluti íbúa hreppsins sé andvígur R-leiðinni.

Sveitarstjórn frestaði ákvörðun um veglínu

Sveitarstjórn Reykhólahrepps frestaði nú síðdegis ákvörðun um leiðarval fyrir framtíðarvegstæði Vestfjarðavegar. Ráðamenn hreppsins vilja funda með samgönguráðherra áður en þetta eldheita mál verður afgreitt.

R-leið um Reyk­hóla féll á um­ferðar­öryggis­mati

Svokölluð R-leið, með stórbrú þvert yfir Þorskafjörð, sem sveitarstjórn Reykhólahrepps hefur stefnt að, féll á nýju umferðaröryggismati og þyrfti fjögurra milljarða króna kostnaðarauka til að hún teldist hæf til að bera Vestfjarðaumferðina.

Oddviti segir Vegagerðina hafa fengið rauða spjaldið

Oddviti Reykhólahrepps segir Vegagerðina sjálfa falla á umferðaröryggisprófi. Tilefnið er sú niðurstaða Vegagerðarinnar að svokölluð R-leið um Reykhóla standist ekki umferðaröryggismat.




Fleiri fréttir

Sjá meira


×