Handbolti

Einkunnir strákanna okkar á móti Brasilíu: Elvar aftur bestur í íslenska liðinu

Elvar Örn Jónsson
Elvar Örn Jónsson Getty//TF-Images
Íslenska handboltalandsliðið náði ekki sigri í áttunda og síðasta leik sínum á heimsmeistaramótinu í Þýskalandi og Danmörku en strákarnir töpuðu þá með þriggja marka mun á móti Brasilíumönnum, 32-29.

Íslenska liðið byrjaði leikinn aftur illa eins og á móti Frökkum og náði síðan aldrei að kóróna ágætar endurkomu sínar í leiknum með því að komast yfir. Fjórum sinnum jöfnuðu strákarnir metin en misstu Brassana alltaf jafnóðum frá sér aftur.  

Líkt og áður þá gefur íþróttadeild Vísis og Stöðvar tvö leikmönnum og þjálfaranum einkunnir fyrir frammistöðu sína.

Elvar Örn Jónsson var besti leikmaður íslenska liðsins í kvöld að mati okkar en hann var mjög áræðinn í sóknarleiknum og kom að ellefu mörkum, mörgum þeirra í seinni bylgjunni sem gekk vel hjá íslenska liðinu.

Seinni bylgjan gekk vel en uppsettur sóknarleikur íslenska liðsins var oft vandræðalega lélegur. Þar hefur Guðmundur Guðmundsson mikið verk að vinna. Hann er hins vegar á réttri leið með liðið og nú þurfa allir strákarnir í liðinu að halda áfram með metnaðinn í botni og byggja ofan á þetta mót í næstu framtíð.

Markvarslan var enn á ný vonbrigði enda endalaust af lélegum langskotum að leka inn. Strákarnir í miðri vörninni virtust síðan hreinlega vera búnir með bensínið þrátt fyrir tveggja daga hvíld.

Leikmenn og þjálfarar fá einkunn á bilinu 1-6 með umsögn, en neðst í fréttinni má sjá hvað hver einkunn þýðir.

Einkunnir Íslands gegn Brasilíu:

- Byrjunarlið Íslands í leiknum -

Björgvin Páll Gústavsson, mark - 2

(9 varin skot - 47:05 mín.)

Hjálpaði til við að koma Íslandi aftur inn í leikinn í fyrri hálfleik. Frammistaða hans á mótinu heilt yfir var engan veginn ásættanleg.

Bjarki Már Elísson, vinstra horn - 2

(3 mörk - 42:17 mín.)

Gerði tilkall í aðdraganda mótsins til að eiga sæti í landsliðinu á heimsmeistaramótinu. Hann var langt frá því að sýna það í dag að hann væri betri en Guðjón Valur Sigurðsson.

Haukur Þrastarson, leikstjórnandi - 2

(0 mörk - 2:00 mín.)

Þetta mesta efni handboltaheimsins fékk að byrja leikinn. Að þessu sinni var verkefnið þremur númerum of stórt. Framtíðin er hins vegar hans og í hans höndum hversu langt hann kemst.

Elvar Örn Jónsson, leikstjórnandi - 4

(7 mörk - 49:38 mín.)

Var besti leikmaður íslenska liðsins í leiknum eins og í síðasta leik gegn Frökkum. Líkamlega sterkur, áræðinn og vogaður. Lykilmaður í framtíðarliði Íslands.

Ómar Ingi Magnússon, hægri skytta - 3

(6 mörk - 22:50 mín.)

Leikurinn var besti leikur Ómars í keppninni. Örlaði á töktum sem hann hefur sýnt í dönsku úrvalsdeildinni. Hann ræður hins vegar ekki við það að bera þessa stöðu einn í íslenska landsliðinu í dag.

Sigvaldi Guðjónsson, hægra horn - 3

(3 mörk - 60:00 mín.)

Átti frábærar innkomur í öllum leikjum Íslands sem hann fékk að taka þátt í. Gríðarlega öflugur leikmaður og fer í flokk með Elvari Erni sem einn af framtíðarmönnum íslenska liðsins.

Arnar Freyr Arnarsson, lína - 2

(2 mörk - 54:40 mín.)

Var í bullandi vandræðum í vörninni allan leikinn og virtist vera algjörlega orðinn bensínlaus. Hann réði engan veginn við þann varnarleik sem var settur upp fyrir leikinn.

Ólafur Gústafsson, vörn - 2

(1 mark - 39:37 mín.)

Er búinn að eiga gott heimsmeistaramót en í leiknum gegn Brasilíu virkaði hann andlaus og umfram allt orkulaus. Hann var einfaldlega búinn á því.

Ólafur Guðmundsson, vinstri skytta, vörn - 2

(2 mörk - 50:44 mín.)

Tveir síðustu leikir Ólafs eru mikil vonbrigði. Hann gekk ekki heill til skógar í þessum leikjum vegna veikinda og náði því engan veginn að sýna það sem í honum býr eða það sem hann hefur sýnt með Kristianstad í Svíþjóð.

Gísli Þorgeir Kristjánsson.Getty/Jörg Schüler
- Menn sem komu inn af bekknum í leiknum -

Gísli Þorgeir Kristjánsson, leikstjórnandi - 3

(2 mörk - 17:12 mín.)

Var í raun maðurinn sem kom íslenska liðinu í gang í leiknum. Frábær leikstjórnandi en gengur ekki heill til skógar. Getur ekki skotið á markið af sjö til átta metrum. Nái hann heilsu verður hann eftir þrjú ár einn besti leikstjórnandi heims.

Ágúst Elí Björgvinsson, mark - 2

(1 varið skot- 10:41 mín.)

Í raun ekkert hægt að kvarta yfir hans frammistöðu og innkomum á mótinu. Markvarslan hjá íslenska liðinu var í raun vandamál íslenska liðsins í hnotskurn. Hefur bætt sig í Svíþjóð en þarf að gera mun betur með íslenska landsliðinu.

Stefán Rafn Sigurmannsson, vinstra horn - 2

(2 mörk - 16:51 mín.)

Olli miklum vonbrigðum á þessu heimsmeistaramóti. Miðað við frammistöðu hans í Ungverjalandi var það ekki ásættanlegt sem hann sýndi með íslenska landsliðinu á heimsmeistaramótinu. Þarf að gera mikið mun betur líkt og kollegi hans í sömu stöðu. Engan veginn nógu gott.

Teitur Örn Einarsson - spilaði of lítið

Ýmir Örn Gíslason - spilaði of lítið

Óðinn Þór Ríkharðsson - spilaði ekki

Daníel Þór Ingason - spilaði ekki

Guðmundur Guðmunddsson.Getty/Jörg Schüler
Guðmundur Guðmunddsson, þjálfari 3

Uppsettur sóknarleikur og varnarleikur liðsins var í molum í upphafi leiksins. Þjálfarinn náði að berja í brestina. Náði markmiðum sínum með því að koma íslenska liðinu í milliriðil en ekkert umfram það. Hefur fengið það hlutverk að koma íslenska landsliðinu í heimsklassa á nýjan leik þannig að við eignumst landslið eins og við áttum frá 2006 til 2014 sem var eitt besta landslið heims. Takist honum það á næstu þremur árum þá er hann snillingur.

Útskýring á einkunnum:

6 - Heimsklassa frammistaða

5 - Frábær frammistaða

4 - Góð frammistaða

3 - Sæmileg frammistaða - skilaði sínu

2 - Ekki nógu góð frammistaða

1 - Slakur leikur




Tengdar fréttir




Fleiri fréttir

Sjá meira


×